Gjaku deri në gju në Homs të Sirisë. Shpresohet në ndërhyrjen e diplomacisë së Vatikanit
Nuk ka fund agonia e gjatë e Homsit në Siri, prej javësh në shënjestër të ushtrisë
së Damaskut. Pavarësisht nga kërkesa e Lidhjes Arabe për të ndaluar menjëherë vrasjet,
edhe sot numërohen 7 viktima, sipas burimeve të aktivistëve kundër regjimit. Kancelarja
gjermane, Angela Merkel paralajmëroi sanksione të reja kundër Sirisë, ndërsa presidenti
kinez Uen Zhabao bëri thirrje për të mos kaluar në luftë civile. Të dielën, në Engjëllin
e Tënzot, edhe Papa Benedikti XVI e ngriti zërin për fundin e dhunës së presidentit
Bashar al Asad në Siri. Fjalë, që janë pritur me mirënjohje në vend, siç tregon në
mikrofonin tonë, themeluesi i bashkësisë murgare të Mar Musës, atë Paolo Dall’Oglio:
Shumë
miq më morën në telefon të më tregonin për thirrjen e Papës. Sigurisht, është diçka
mëse pozitive. Është ngushëllim i madh për sirianët, natyrisht për katolikët, por
edhe për të gjithë të krishterët e, do të thosha madje, edhe për të gjithë qytetarët
sirianë. Papa mbajti një qëndrim shumë realist, por njëkohësisht, ungjillor. Tani,
është e rëndësishme që këto fjalë të mos mbeten vetëm një thirrje nga dritarja: Papa
nuk mund të bëjë gjë i vetëm. Ka ardhur koha të veprojnë të gjithë të krishterët e
të gjithë ata, që ia duan të mirën Sirisë.
Sipas jush, kjo thirrje është
paralajmërim i ndonjë hapi tjetër të diplomacisë së Selisë së Shenjtë?
Shpresoj
vërtet shumë. E kam kërkuar qartë këtë para një jave – siç e dini – dhe shoh se tani,
më në fund, kemi një pikënisje shumë interesante, që ndjek qëndrimet koherente të
Vatikanit, në të gjitha etapat e krizës. Nuk mund ta lemë Sirinë në gjendjen ku është
zhytur. Vatikani ka avantazhin të përfaqësojë një diplomaci pa interesa të veçanta
në zonë, që mund t’i bindë palët në konflikt. Përvoja e Selisë së Shenjtë gjatë dhjetëvjeçarëve
të fundit në dialogun me Islamin, si atë sunit, ashtu edhe atë shiit, mund t’i shtyjë
palët ta dëgjojnë.