Thirrje e Papës në Engjëllin e Tënzot: t’i jepet fund gjakderdhjes në Siri! Dashuria
e Zotit është më e fortë se e keqja më e tmerrshme.
Përballë një turme të madhe besimtarësh, mbledhur në Sheshin e Shën Pjetrit, duke
sfiduar ngricën e fortë, që sundon prej ditësh mbi Romën e veshur krejt me të bardha,
Papa bëri një thirrje urgjente për t’i dhënë fund dhunës në Siri. T’ i jepet fund
një herë e mirë gjakderdhjes, ngriti me forcë zërin Benedikti XVI. Para lutjes
mariane, Papa komentoi fragmentin e Ungjillit, në të cilin përshkruhet shërimi i
të gërbulurit. Vetëm Jezusi, i siguroi Ati i Shenjtë besimtarët, mund të na çlirojë
nga gërbula e mëkatit e nga hutimet e jetës.
Papa ndjek me
vëmendje të madhe episodet dramatike të dhunës në rritje, që po trondisin rëndë Sirinë,
duke shkaktuar një numër gjithnjë më të madh të vdekurish. I kujton çdo ditë në lutje
viktimat, ndërmjet të cilave, shumë fëmijë, të plagosurit dhe të gjithë ata, që vuajnë
pasojat e një konflikti gjithnjë më tronditës. Prej këndej Ati i Shenjtë përsëriti
thirrjen për t’i dhënë fund luftës e gjakderdhjes: “I ftoj të gjithë,
e posaçërisht autoritetet politike në Siri, të zgjedhin rrugën e dialogut, të pajtimit
e të impenjimit për paqen. Është urgjente t’u përgjigjen shpresave të pjesëtarëve
të ndryshëm të Kombit, ashtu si edhe dëshirave të bashkësisë ndërkombëtare, që shqetësohet
për të mirën e përbashkët të mbarë shoqërisë e të zonës”. Në katekizëm
Papa komentoi Ungjillin e së dielës, në të cilin Jezusi , duke kapërcyer ligjin,
që e ndalonte, prek e shëron një të gërbulur. Në këtë gjest, kujtoi Papa, përmblidhet
e gjithë historia e shëlbimit, mishërohet vullneti i Zotit për ta shëruar njeriun,
për ta pastruar nga sëmundja, simbol i së keqes, që i shpërfytyron dhe i rrënon marrëdhëniet
ndërmjet nesh: “Në këtë takim të dorës së Jezusit me dorën e të gërbulurit,
shembet menjëherë çdo pengesë ndërmjet Hyjit e ndyrësisë njerëzore, ndërmjet së Shenjtes
e të kundërtës së saj; e sigurisht jo për ta mohuar të keqen dhe forcën e saj negative,
por për të treguar se dashuria e Zotit është më e fortë se çdo sëmundje, edhe se sëmundja
më e keqe, më ngjitëse, më e tmerrshme. Jezusi mori mbi vete sëmundjet tona, u bë
‘i gërbulur’, që ne të pastroheshim nga fëlliqësitë tona”. Papakujtoi,
më pas përvojën e Shën Françeskut në çastin kur, ende mëkatar, u takua me të gërbulurit: “Në
këta të gërbulur, të cilët Françesku i takoi, kur qe ende në mëkate, ishte i pranishëm
vetë Jezusi; e, kur Françesku iu afrua njërit prej tyre dhe, duke e mundur neverinë,
e përqafoi, Jezusi e shëroi nga gërbula e tij, domethënë, nga krenaria dhe e ktheu
në rrugën e dashurisë së Zotit. Ja, kjo është fitorja e Krishtit: shërimi ynë i plotë
e rilindja për një jetë të re”. Më pas Papa kujtoi festën e Zojës Lurdë,
që u kremtua të shtunën e kaluar. Shën Bernardetës, pohoi, Zoja e Bekuar i dorëzoi
një mesazh tejet aktual: ftesën për lutje e pendesë: “Përmes Nënës
së tij, është gjithnjë Jezusi që vjen të na takojë, për të na çliruar nga çdo sëmundje
e korpit dhe e shpirtit. Ta lëmë të na prekë e të na pastrojë, e të kemi mëshirë për
vëllezërit tanë”.Në përfundim, Papa u uroi të pranishmëve të dielë e javë
të gëzuar dhe i ftoi në takimin së dielës së ardhshme, një e dielë - uroi, pa dëborë
e pa ngrica.