Кс. Ламбардзі аб сексуальных злоўжываннях: ад трывогі да надзвычайных ініцыятыў
“Ад трывогі да паслядоўных
і надзвычайных ініцыятыў, якія спрыялі б абароне дзяцей ў Касцёле, грамадстве і свеце”,
- так ахарактэрызаваў пазіцыю Касцёла кіраўнік Залі Друку кс. Фэдэрыко Ламбардзі,
падводзячы вынікі міжнароднага сімпозіўма на тэму сексуальных злоўжыванняў адносна
непаўналетніх, які завяршыўся 9 лютага ў Грыгарыянскім універсітэце ў Рыме. Святар
нагадаў, што форум праходзіў у рэчышчы выказванняў Бэнэдыкта ХVI па гэтай праблеме:
пачуць ахвяраў сексуальных злоўжыванняў, дапамагаць іх аздараўленню, прыняць справядлівыя
меры адносна вінаватых у злачынствах, распрацаваць і ажыццявіць на практыцы эфектыўныя
меры па прафілактыцы, каб дзеці і моладзь адчувалі сябе бяспечна і ўтульна ў касцёльным
асяроддзі. Кс. Ламбардзі адзначыў, што рымская сустрэча прадэманстравала намаганні
Касцёла зрабіць канкрэтны ўклад у абарону дзяцей. “Сям’я, навучальныя ўстановы, інтэрнэт,
распаўсюджванне дзіцячай парнаграфіі, адукацыя святароў і педагогаў – гэта асноўныя
аспекты, якія ўсебакова разглядаліся падчас абмеркавання гэтай праблемы”, - адзначыў
італьянскі езуіт.
Святар падкрэсліў, што шматвяковы адукацыйны досвед Касцёла
ў многіх культурах – гэта тэст па абароне дзяцей ў розных кантэкстах. “Ідучы з рашучасцю
распачатым шляхам супрацоўніцтва з кампетэнтнымі органамі і людзьмі добрай волі ў
розных краінах свету, Каталіцкі Касцёл хоча ўнесці істотны ўклад у адну з самых важных
праблем будучыні чалавецтва – ахову дзяцей і падлеткаў”, - падкрэсліў кс. Ламабардзі
падчас выступлення на Ватыканскім радыё ў сваёй аўтарскай рубрыцы “Octava Dies”.