Арцыбіскуп Зімоўскі: жыць разам з хворым – гэта сапраўдная школа жыцця
Арцыбіскуп Зыгмунт
Зімоўскі, старшыня Папскай рады пастырства работнікаў сферы аховы здароўя, у сваіх
разважаннях на Сусветны дзень хворага, які ў Касцёле адзначаецца 11 лютага, нагадаў
пасланне Бэнэдыкта ХVI на гэты дзень, у якім Папа падкрэслівае фундаментальную ролю
веры і сакрамэнтаў у аздараўленні церпячых і хворых. Іерарх адзначыў, што з самага
пачатку хрысціянскай эры ў апостальскім жыцці Касцёла вялікае значэнне мела апека
над хворымі асобамі. Ён нагадаў, што менавіта “па ініцыятыве Касцёла былі заснаваны
першыя шпіталі”; а сёння ў свеце налічваецца больш за 120 тыс. касцёльных медыцынскіх
устаноў.
Кіраўнік ватыканскай дыкастэрыі падкрэсліў, што ў наш час пастырства
ў сферы аховы здароўя надае вялікую ўвагу праблемам медыцынскай этыкі, якасці жыцця,
арганізацыі санітарнай службы. “Бо Касцёл верыць у святасць кожнай чалавечай істоты,
якая не з’яўляецца нумарам ці нейкім аб’ектам, але асобай, да якой трэба падыходзіць
па-чалавечы”, - адзначыў арцыбіскуп Зімоўскі. Іерарх звярнуў увагу таксама на адукацыю
асоб, які пакліканы працаваць у сферы аховы здароўя. Ён нагадаў аб важнасці сакрамэнтаў,
якія прымаюць у сваім жыцці хворыя. “Сакрамэнты спрыяюць канкрэтнаму і эфектыўнаму
ўнутранаму аздараўленню, з’яўляюцца адзіным лекам, які дае надзею”, - адзначыў кіраўнік
ватыканскай дыкастэрыі. Ён звярнуў увагу на тое, што хрысціянская надзея і самаадданасць
у дапамозе дзецям, хворым, пажылым, інвалідам – становіцца аднаўленчай сілай грамадства
і робіць хворых першымі будаўнікамі сапраўднай супольнасці. На заканчэнне сваіх разважанняў
арцыбіскуп Зімоўскі адзначыў, што жыць разам з хворымі – гэта сапраўдная школа жыцця.