Апостальская Сталіца абвяргае абвінавачванні італьянскай газеты
Заля Друку Апостальскай
Сталіцы выдала спецыяльнае паведамленне ў сувязі з публікацыяй у італьянскай газеце
“L’Unità”. Аўтар артыкула абвінавачвае чатырох італьянскіх святароў у выкарыстанні
для нелегальных аперацый з грашыма “Інстытута рэлігійных спраў”, папулярна называнага
ватыканскім банкам. Акрамя таго, адзначаецца, што нібыта сама гэта ўстанова была задзейнічана
ў нелегальнай дзейнасці і не дапамагала італьянскім уладам пераследваць гэтых асобаў.
У
сённяшнім паведамленні Апостальскай Сталіцы адзначаецца, што “артыкул сведчыць аб
несур’ёзным падыходзе аўтара да вывучэння сітуацыі”. “Загаловак кажа аб маўчанні Ватыкана.
Але ў рэальнасці, гэта сцвярджэнне не мае пад сабой фундамента: Апостальская Сталіца
і кіраўніцтва Ватыкана належным чынам супрацоўнічалі з магістратам і італьянскімі
ўладамі”, - гаворыцца ў дакуменце. Акрамя таго, звяртаецца ўвага на тое, што “нават
павярхоўны пошук артыкулаў гэтага аўтара ў інтэрнэце, дае магчымасць убачыць, што
прадстаўленая інфармацыя не з’яўляецца навіной”. “Гаворка ідзе аб абвінавачваннях
у адмыванні грошаў, аб якіх журналістка, пісала ўжо шмат разоў у мінулым. Узнікае
пытанне: ці не з’яўляецца артыкул свайго роду рэкламай для якой-небудзь вячэрняй
тэлевізійнай праграмы”, - падкрэсліваецца ў паведамленні Апостальскай Сталіцы.
Адзначаецца,
што Інстытут рэлігійных спраў на працягу 2006-2007 г. правёў належную праверку рахункаў
сваіх кліентаў, каб выявіць існаванне падазроных здзелак. Акрамя таго, на працягу
некалькіх гадоў у Ватыкане дзейнічае закон аб барацьбе з адмыванне грошай, “на што,
нажаль, не звяртаецца ўвага з боку СМІ”. У паведамленні Залі Друку падкрэсліваецца,
што абвінавачванні аб нелегальнай дзейнасці некаторых з указаных у артыкуле асобаў
станавіліся прычынай для раследванняў з боку італьянскіх фінансавых службаў, але яны
не пацвердзіліся.