Ռուսիոյ ԱԳ Նախարարը Կը Քննադատէ Արեւմուտքի «Ջղագրգիռ» Հակազդեցութիւնը. ԱՄՆ փակած
Սուրիոյ իր Դեսպանատունը :
Ռուսիոյ արտաքին գործոց նախարար Սերգէյ Լաւրով այսօր Ռուսիոյ գաղտնի սպասարկութեան ղեկավար
Միխայիլ Ֆրատքովի հետ Դամասկոս այցելութեան նախօրեակին քննադատեց Ռուսիոյ եւ Չինաստանի
կողմէ ՄԱԿ-ի Ապահովութեան խորհուրդին մէջ Սուրիոյ հարցով բանաձեւին դէմ օգտագործուած
վեթոյին նկատմամբ Արեւմուտքի հակազդեցութիւնը, զոր «ջղագրգիռ» որակեց: Ան յիշեցուց ասացուածք
մը, զոր կ՛ըսէ. «Ան որ կը ջղայնանայ, հազուադէպօրէն իրաւացի կ՛ըլլայ»: Լաւրով նշեց, որ
այդ «ջղագրգիռ յայտարարութիւններուն նպատակը տեղի ունեցածը ծածկելու համար է, այսինքն`
(ծածկել) այն, որ Սուրիոյ մէջ բռնարարքը շարք մը աղբիւրներ ունի» «Ցաւալի է, որ բանաձեւը
այս ճակատագիրը ունեցաւ», ըսաւ Լաւրով` աւելցնելով, որ «Որոշումի բանաձեւման մասնակիցներէն
քանի մը օր խնդրեցինք, որպէսզի կարենանք կացութիւնը քննարկել» Դամասկոս այցելութեան ընթացքին:
Լաւրով մերժեց Սուրիոյ նախագահ Պաշշար Ասատին փոխանցելիք պատգամին մասին տեղեկութիւն
տալ: Միւս կողմէ ԱՄՆ փակած է իր դեսպանատունը Սուրիոյ մէջ` երկրի մէջ տիրող լարուածութեան
պատճառով: Երկուշաբթի երեկոյեան դեսպանատան բոլոր աշխատակիցները` ներառեալ դեսպան Ռոպերթ
Ֆորտ, Դամասկոսէն մեկնած են իրենց երկիրը: