Do të paraqitet në Romë vepra “Liturgjia Hyjnore dhe Java e Madhe”, me autor don Paskuale
Ferraro.
Të shtunën, më 18 shkurt, në orën 17, në Via dei Greci 46, Romë, arbëreshë e shqiptarë
do të mblidhen përsëri, për të marrë pjesë në paraqitjen e një libri të ri, sa të
nevojshëm, aq me vlerë. Vëllimi,i përgatitur nga don Paskuale Ferraro,
titullohet: “Liturgjia Hyjnore dhe Java e Madhe”. Është një përpunim muzikor
i temave popullore dhe këngëve kryesore të Liturgjisë së Ritit Bizantin, që vijojnë
të përdoren në kishat katolike të arbëreshëve të Italisë, të cilave u përket meshtari-muzikant. Pjesët
e zgjedhura janë kompozuar me katër zëra të ndryshme, duke të krijuar një harmoni
krejt të re për këtë gjini, posaçërisht për zonën greke e jug ballkanike, prej nga
vijnë këngët. Autori synon ta edukojë veshin e dëgjuesit për t’i shijuar meloditë
e lashta, karakteristike për arbëreshët e emigruar në Itali, që nga Moti i Madh. E
ndonëse që asokohe kanë kaluar më se 500 vjet, ata ruajtën kulturën, doket e ritet
lindore të të parëve. Është një ndihmesë me vlerë, kjo që sjell Don Paskuale, e
jo vetëm për arbëreshët, por edhe për mbarë Kishën në Itali e cila duhet të përballojë
një valë shkëmbimesh ndërkulturore dhe ekumenike, për shkak të dyndjes së emigrantëve
nga Evropa lindore. Kjo përmbledhje ndihmon jo vetëm për përtëritjen shpirtërore
në bashkësitë e ritit bizantin, ku muzika zë kryet e vendit gjatë kremtimeve, por
edhe për mikpritjen e emigrantëve që, duke pasur të njëjtat rite e të njëtat tradita,
e ndjejnë veten në kishë, si në shtëpinë e tyre. Fondacioni Migrantes i Konferencës
Ipeshkvnore Italiane dhe Famullia e Shën Nikollës në Leçe, që kontribuan për shtypjen
e vëllimit, urojnë që këto tekste muzikore të përdoren me fryte shpirtërore e t’i
hapin udhën autorit për botimin e librave të rinj, në nder e lavdi të Zotit e në ndihmë
të besimtarëve të cilët, të prekur në shpirt nga muzika, ta pasurojnë jetën e tyre
shpirtëore. Vëllimi shoqërohet me një CD, në të cilin janë regjistruar pjesët muzikore,
luajtur nga Kapela Ludovicea e Romës, me drejtor orkestre, Mjeshtrin Ildebrando Mura.
Për këtë vëllim, në takimin e 18 shkurtit, do të flasin Arkimandriti, Profesor
Manel Nin, rektor i Kolegjit Papnor Grek, i cili do të mbajë një kumtesë, titulluar
“Roli i muzikës në Liturgjinë bizantine”, pasuar nga Protopapàs Nik Paçe, famullitar
i Kishës bizantine të Shën Nikollës së Mirës, në Leçe të Italisë. Kumtesa e Don Nikut
titullohet “Impenjim i ri për interpretimin e muzikës së Kishës bizantine” Në
përfundim të kumtesave, të pranishmit do të ndjekin disa fragmente muzikore nën kujdesin
e autorit. Takimin do ta drejtojë profesor Domeniko Morelli. Ftohen të marrin
pjesë të gjithë dashamirët e muzikës e të kësaj Vatre, rreth së cilës nuk kanë pushuar
s’u mbledhuri për të dëgjuar të rejat nga të gjitha fushat e jetës së Atdheut, arbëreshë
e shqiptarë. Kujtojmë se për Don Ferraron, ky nuk është libri i parë i kësaj natyre.
Kapelani për Shqiptarët në Itali ka botuar, në ndihmë të besimtarëve të tij, edhe
Librin “Lëvdojeni Zotin”, përmbledhje e këngëve kishtare, që shërbejnë për shoqërimin
e kremtimit të Meshës Shenjte, pasuruar edhe me Rendin e Meshës me popull, në shqip
e italisht. Libri tashmë është bërë i domosdoshëm për shqiptarët mërgimtarë, që mblidhen
të dielave në Kishën romake të Shën Gjonit të Malvës, për të ndjekur Meshën Shenjte.