Simpozium në Universitetin Gregorian për abuzimet e klerit ndaj të miturve
Filloi sot në Universitetin Gregorian të Romës, simpoziumi me titull “Drejt shërimit
e përtëritjes”, në të cilin marrin pjesë ipeshkvij katolikë e eprorë të urdhërave
të ndryshme rregulltare, që po diskutojnë mbi çështjen e abuzimeve të disa anëtarëve
të klerit ndaj të miturve. Simpoziumi do të përfundojë më 9 shkurt. Në të përfaqësohen
mëse 100 konferenca ipeshkvnore e mëse 30 urdhëra rregulltarësh. Gjithashtu, janë
të pranishëm dhjetë kardinaj e rreth 40 specialistë. “Ky Simpozium – shpjegoi drejtori
i Sallës së Shtypit të Vatikanit, atë Federiko Lombardi – nuk është qëllim në vetvete,
por kontribut i veçantë në kuadrin e udhës së ndërmarrë, për të vendosur mbi strategjinë
e mëtejshme”. Pra, nga Universiteti Gregorian, ku po zhvillohet konferenca, duhet
t’u arrijnë të gjitha Kishave lokale, direktiva dhe ide, që t’i ndihmojnë barinjtë
e grigjës së Zotit të përballojnë çështjen dramatike të abuzimeve mbi të miturit e
të mbrojnë viktimat. Ndër nismat, që do të fillojnë konkretisht në përfundim të takimit,
është edhe hapja e Qendrës për Mbrojtjen e Fëmijëve, me seli në Munih, falë kontributit
të “Papal Foundation”, i autorizuar drejtpërdrejt nga Benedikti XVI. Projekti parashikon
që përmes internetit, të realizohet një platformë mësimdhënieje për lëndët e psikologjisë,
pedagogjisë, teologjisë dhe së drejtës kishtare për të gjithë ata, që kanë punë me
fëmijët në gjirin e Kishës. Qendra do të varet nga Instituti i Psikologjisë i Universitetit
Gregorian, në bashkëpunim me Klinikën psikiatrike për të miturit, në Universitetin
e Ulmit, në Gjermani. Struktura do të punojë me tetë partnerë në të gjithë botën,
në katër gjuhë: anglisht, spanjisht, italisht e gjermanisht. Ndër relatorët e simpoziumit,
edhe zonja Marie Collins, viktimë e abuzimeve, e cila do të dëshmojë mbi ndihmën,
që mund t’u jepet personave si ajo nga Kisha. Parashikohet edhe një lutje pendestare,
kryesuar nga prefekti i Kongregatës për Ipeshkvijtë, kardinali Oje, për t’u kërkuar
falje viktimave të abuzimeve. Mbi përparësitë e këtij Simpoziumi dhe mbi udhën për
të ndihmuar viktimat, intervistuam drejtorin e Institutit të Psikologjisë në Universitetin
Gregorian, jezuitin, atë Hans Zollner: Dimë se masa më e mirë është dëgjimi,
dëgjimi i vuajtjes. Kjo po ndodh gjatë muajve të fundit në Irlandë, ku shkandulli
i abuzimeve ndihet shumë në shoqëri e në Kishë. Kjo është kryesorja. Përveç kësaj,
shumë vetë kanë marrë nga Kisha ndihmë për psikoterapi, ose për ndonjë lloj tjetër
terapie; pastaj, dëmshpërblimi ekonomik, i cili tregon se Kisha merr përsipër përgjegjësinë
për atë që kanë bërë shërbenjësit e saj. Si sillet Kisha me ata që i kanë kryer
këto abuzime e si duhet sjellë në përgjithësi? Çdo njeri, që abuzon mbi tjetrin,
duhet trajtuar sipas kapacitetit e sipas vetëdijes për atë, që ka bërë. Ka njerëz,
që kanë abuzuar, por që nuk kanë treguar as kujdesin e as ndjeshmërinë më të vogël
për viktimat dhe për gjestin e tyre; ka njerëz, vërtet të pakurueshëm e këta vetëm
mund të mbyllen e të kontrollohen. Nuk është zgjidhje vetëm t’i largosh nga meshtaria,
apo nga jeta e shuguruar, pasi nëse nuk ka kontroll, gjendja përsëritet. Sigurisht,
ky është shkandull në gjirin e Kishës, por Kisha është edhe bashkësi mëkatarësh. Prandaj,
Kisha nuk mund thjesht të distancohet e të largojë fajtorët, por duhet të ofrojë terapi
të mundshme… Me disa funksionojnë, me të tjerë, shumë pak. Pra, duhet parë kapaciteti
i njeriut, sa mundësi ka për ta kuptuar të keqen e për të reaguar ndaj saj. Agresorët
seksualë janë kudo në shoqëri, por në Kishë, njerëzit nuk hyjnë rastësisht. Meshtarët
e rregulltarët e zgjedhin këtë rrugë, në të cilën ata pranohen, në një farë mënyre.
Në kuadrin e parandalimit, a mund të vlerësohet nëse ka njerëz të prirur për këto
lloj sjelljeje, apo jo? Ka disa shenja shumë të qarta, që tregojnë se mund të
kemi probleme lidhur me një personalitet pedofil. Psikologjia, ashtu si të gjitha
njohuritë njerëzore, mund të gabojë: psikoterapia e psikiatria nuk janë shkenca ekzakte.
Në pranimin për meshtari, kriteret duhet të jenë shumë të qarta, siç ka thënë kohët
e fundit, edhe Kongregata për Edukimin Katolik: në zgjedhjen e kandidatëve për meshtarë
duhet vërtet të kemi kritere shumë rigoroze.