Біскуп Дзям’янка: адукаванасць чалавека павышае яго адказнасць
18 мая ў Рыме скончыла
сваю працу пасяджэнне Папскай рады “Iustitia et pax”. У яе працах прымаў удзел дапаможны
біскуп Мінска-Магілёўскай архідыяцэзіі Антоні Дзям’янка. Ён распавёў у інтэрв’ю нашай
праграме аб асаблівасцях сёлетняга пасяджэння.
Ваша Эксцэленцыя, сёння Папскай
радай “Iustitia et pax” быў апублікаваны дакумент, у якім
раскрываецца тэма наступнага Сусветнага дня міру, які будзе адзначацца 1 студзеня
2012 г. Яна непасрэдна связана з моладзю. Папская рада “Iustitia et pax”
ставіць акцэнт на моладзь, на дзейнасць моладзі ў спрыянні міру і справядлівасці ў
свеце. Скажыце калі ласка, чаму менавіта моладзь можа адыграць у гэтым працэсе важную
ролю?
Калі мы гаворым пра працу Папскай рады “Iustitia et pax”, сапраўды
яна паклікана дапамагчы чалавецтву ў мірным суіснаванні ў розных рэгіёнах свету і
гэта было бачна падчас выступленняў удзельнікаў спаткання. Трэба адзначыць, што найбольш
дзейсныя і актыўныя вернікі ў розных рэгіёнах, гэта менавіта маладыя людзі.
Але,
калі казаць аб сустрэчы, у якой я прымаў удзел – яна была прысвечана 50-годдзю энцыклікі
“Mater et Magistra” (“Маці і настаўніца”), якая была выдадзена папам Янам ХХІІІ у
1961 г. Нажаль, у нашай краіне на той час існавала сітуацыя, у якой пасланне Святога
Айца, якое было скіравана не толькі да католікаў, не мела магчымасці дайсці да людзей.
У ёй закраналіся пытанні існавання чалавецтва на планеце, суіснавання людзей, адказнасці
за экалогію. Калі б ў той час жыхары ўсіх кантынентаў сур’ёзна паразважалі над тымі
ўказаннямі, што змешчаны ў энцыкліцы, напэўна сёння атрымалася б пазбегнуць многіх
трагедый. Напрыклад такой, як выбух на Чарнобыльскай АЭС. Бо ў энцыкліцы было шмат
заўваг адносна экалогіі – як адносіцца да прыроды, каб яна, як мага даўжэй служыла
чалавеку.
Эксцэленцыя, сёння пытанне міру і супакою, гэта вельмі вялікая
праблема. Гэта не толькі праблема адсутнасці вайны. У кантэксце Беларусі, Каталіцкага
Касцёла ў Беларусі – якім чынам мы можам паспрыяць, каб сённяшні свет жыў у супакоі
і быў больш справядлівым.
Многія падчас пасяджэння звярталі ўвагу
на тое, што ў сучасным свеце адукацыя павінна быць даступна для ўсіх людзей. Адукаванасць
чалавека павышае яго адказнасць. Адказнасць за іншага, адказнасць за асяродзе, у якім
ён жыве. Калі казаць пра мірнае суіснаванне – былі ўзняты пытанні звязаныя з грашыма.
Была падкрэслена адказнасць тых, хто мае вялікія грашовыя сродкі, якія на самой справе
належаць не толькі ім. Абавязак такіх людзей – дзяліцца з бяднейшымі. Даць ім адпаведны
старт, каб яны, ў гэтам свеце, таксама адчувалі сябе добра.
Ваша Эксцэленцыя,
дзякуй за інтэрв’ю і за тое, што Вы былі госцем у нашай студыі. Жадаем поспехаў на
душпастырскай ніве ініве пашырэння і спрыяння супакою.