Irak: dënohen me vdekje terroristët e masakrës kundër të krishterëve në vitin 2010.
Imzot Varduni: ne i falim.
Dje, në Bagdad, edhe selia e gjykatës së apelimit konfirmoi dënimin me vdekje, dhënë
nga një gjykatë irakiane, për tre terroristë, akuzuar si shkaktarë të masakrës kundër
të krishterëve në Kishën e Zojës së Çlirimit. Më 31 tetor të vitit 2010, një grup
kamikazesh hapi zjarr dhe u hodh në erë në kishën e kryeqytetit, duke shkaktuar vdekjen
e 58 vetëve dhe plagosjen e 75 të tjerëve. Në mikrofonin tonë, ipeshkvi ndihmës
i Bagdadit, imzot Shlemon Varduni, flet jo për dënimin, por për faljen e autorëve
të krimit të shëmtuar në dëm të grigjës së tij:
Përgjigje:
- Krishtërimi është për jetën, jo për vdekjen, prej këndej, parimet katolike
nuk mund ta miratojnë dënimin me vdekje. Përkundrazi, mund të miratojnë vetëm faljen.
Natyrisht edhe dënimin e fajtorëve, por jo me vdekje.
Pyetje: -
Kujtimi i masakrës, që tronditi asokohe Bagdadin, a solli ndonjë ndryshim në ndjenjat
e bashkësisë së krishterë irakiane?
Përgjigje: - U ndje si
dënim për të gjithë, e prandaj ndikoi fuqimisht mbi emigrimin e të krishterëve. Natyrisht
ishte një masakër tepër gjakatare, por ama nuk ishte e vetmja: kemi pasur edhe masakra
të tjera: në ministri, në rrugë, në tregje, në kisha të tjera; nuk kanë munguar as
vrasjet e meshtarëve, madje u vra edhe një ipeshkëv. Është tronditëse të kujtosh atë,
që po jetojmë që nga viti 2003 e deri më sot. Posaçërisht ne të krishterët. Por jo
vetëm ne.
Pyetje. - Shpresoni se së shpejti një situatë e tillë
do të ndryshojë?
Përgjigje: - Po, shpresoj se e gjithë kjo
do të ndryshojë, për hir të mëshirës së Zotit. Prandaj i lutemi Zotit të na japë paqen.
Nuk duam tjetër. Iraku është shumë i pasur, nuk ka nevojë për forca të tjera, në se
nënshtetasit e tij do të dinë të punojnë pa interesa personale, partiake e fetare.
Interesa nga të cilat, pastaj, buron urrejtja, lufta. Kjo na mungon: zelli, heroizmi
i krishterë për t’iu përgjigjur edhe urrejtjes me dashuri. Lutuni edhe ju, bashkë
me ne, që mbarë Lindja e Mesme, Iraku e bota të jetojnë në paqe.