Në Paraqitjen e Jezusit në Tempull, Papa u kërkoi rregulltarëve të dëshmojnë Krishtin
e t’i plotësojnë si duhet detyrat
Në Solemnitetin e sotëm të Paraqitjes së Jezusit në Tempull, Dita e 16-të e Jetës
së Shuguruar, Papa Benedikti XVI u kërkoi rregulltarëve të dëshmojnë Krishtin e t’i
plotësojnë si duhet detyrat, që kanë në bashkësinë e krishterë. Ati i Shenjtë kremtoi
Mbrëmësoret në Bazilikën e Shën Pjetrit në Vatikan, në praninë e rregulltarëve e të
murgeshave, që e kishin mbushur kishën plot e përplot. Në fillim të homelisë,
me penelata të shpejta, Papa përshkroi tabllonë e festës. 40 ditë pas lindjes së Jezusit,
shën Maria e shën Jozefi, duke iu bindur ligjit hebraik, shkojnë në Jeruzalem për
t’ia ofruar birin e tyre Zotit. Ky gjest pritet me admirim të jashtëzakonshëm nga
Simoni i moshuar e nga profetesha Ana, të cilët shohin në atë fëmijë, Mesinë e shpallur
nga profetët. Duke iu referuar këtij episodi ungjillor, Benedikti XVI theksoi: “Në ditën,
në të cilën Kisha kujton paraqitjen e Jezusit në Tempull, kremtohet edhe Dita e Jetës
së Shuguruar. Vërtet, episodi ungjillor përkatës është një ikonë domethënëse e dhurimit
të jetës, nga ana e atyre, që janë thirrur të riparaqesin para Kishës e para botës,
përmes zbatimit të këshillave ungjillore, tiparet karakteristike të Jezusit, virgjër,
i varfër e i bindur, i Shuguruari i Atit Qiellor. Prandaj, në festën e sotme kremtojmë
misterin e shugurimit: shugurim i Krishtit, shugurim i Marisë, shugurim i të gjithë
atyre, që ndjekin Jezusin në hir të dashurisë për Mbretërinë e Zotit”. Por
cili është qëllimi i kësaj dite, që Kisha ia kushton veçanërisht atyre, të cilët kanë
vendosur të jetojnë vetëm për Hyjin, duke u shërbyer përvuajtërisht të gjithë njerëzve?
Duke cituar të Lumin Gjon Pali II, që e pati kremtuar për herë të parë në vitin 1997,
Papa Racinger vuri në dukje disa aspekte të Ditës së Jetës së Shuguruar: “Para
së gjithash, ajo dëshiron t’i përgjigjet nevojës për t’i thurur lavde e për të falenderuar
Zotin për dhuratën e kësaj jete, që i përket shenjtërisë së Kishës… Përveç kësaj,
synon të vlerësojë gjithnjë e më shumë dëshminë e atyre, që kanë vendosur të ndjekin
Krishtin përmes zbatimit të këshillave ungjillore e duke nxitur njohjen e vlerësimin
e jetës së shuguruar në Popullin e Zotit… Së fundi, kjo Ditë është rast i çmuar për
të përtërirë kushtet e për të gjallëruar ndjenjat, që frymëzojnë dhurimin e vetvetes
për Zotin”. Ati i Shenjtë kujtoi se me rastin e 50-vjetorit të Koncilit II
të Vatikanit, ka shpallur Vitin e Fesë, i cili do të fillojë në tetor të 2012-ës.
Ai i ftoi rregulltarët e murgeshat që, duke ndjekur edhe direktivat e eprorëve e të
Kongregatës së tyre, ta përjetojnë këtë vit si rast për të përtërirë vlerat thelbësore
të jetës: “Në Vitin e Fesë, ju, që keni pranuar thirrjen për të ndjekur Krishtin
më nga afër… duhet t’i thelloni edhe më shumë marrëdhëniet me Zotin. Këshillat ungjillore,
të pranuara si rregulla të vërteta të jetës, e përforcojnë fenë, shpresën dhe dashurinë,
të cilat ju bashkojnë me Zotin… Shën Maria Virgjër, dishepulle, shërbëtore e nënë
e Zotit ndërhyftë pranë Jezusit që ‘të gjithë ata, të cilët kanë marrë dhuratën për
ta ndjekur në jetën e shuguruar, të dinë ta dëshmojnë me jetën e tyre të shndërruar,
duke ecur me gëzim me vëllezërit e motrat e tjera drejt atdheut qiellor e drejt dritës,
që nuk perëndon kurrë’”.