Primati anglikan Rowan Williams viziton Tokën e Shenjtë
Paqe, pajtim, marrëdhënie ndërkishtare e ndërfetare, harmoni e re në Lindjen e Mesme:
janë këto temat, trajtuar nga kryeipeshkvi i Canterbury, i nderuari Rowan Williams,
kryetar i Bashkësisë anglikane, të shtunën e kaluar në Nazaret, në St. Margaret Guesthouse,
ku mori pjesë në një takim ndërfetar, gjatë shtegtimit të tij në Tokën e Shenjtë.
Në fjalimin e rastit, primati anglikan përçoi posaçërisht, mesazhin e Nazaretit. Nënvizoi,
kështu, se të gjithë besimtarët duhet t’i përgjigjen ftesës për ta jetuar fenë e
Abrahamit e për ta realizuar premtimin e tij, duke u përpjekur t’i ngjajnë Marisë
së Nazaretit, të ecin në gjurmët e saj, gjithnjë të gatshëm për ta pranuar fjalën
e Zotit e për të bërë plotësisht vullnetin e tij. Gjatë takimit, lexojmë në faqen
e internetit të Patriarkanës Latine të Jeruzalemit , morën pjesë myslimanë, druzë
e të krishterë të konfesioneve të ndryshme. Katolikët përfaqësoheshin nga imzot Elias
Shacour, kryeipeshkëv melkit i Akrit dhe ipeshkvi i nderit, imzot Boutros Mouallem. E
morën fjalën ipeshkvi Suheil Dawani i Kishës anglikane të Tokës së Shenjtë; Shehu
Muafaq Tarif, në emër të druzëve; Shehu Fihmi Ahmad, në emër të myslimanëve; kryeipeshkvi
Shacour, në emër të të krishterëve. Imzot Marcuzzo, duke i drejtuar përshëndetjen
e mirëseardhjes kryeipeshkvit të Canterbury, e falënderoi për qëndrimin e tij të
jashtëzakonshëm në mbrojtje të drejtësisë e të paqes në Tokën e Shenjtë e, përgjithësisht,
në Lindjen e Mesme; për vizionin e krishterë mbi çështjet shkencore, si evolucioni;
për dialogun ekumenik e ndërfetar si dhe për marrëdhëniet e shkëlqyera me Kishën
Katolike, që spikatën posaçërisht lidhur me vizitën e Papës në Angli, lumnimin e John
Henry Newman e edhe me Ordinariatin Personal, krijuar posaçërisht për anglikanët e
kthyer në fenë katolike. Kryeipeshkvi i Canterbury do të bëjë, këto ditë, disa
vizita baritore në bashkësitë anglikane të vendit. Do të marrë pjesë edhe në një mori
takimesh kushtuar dialogut ndërfetar.