31 студзеня Заля Друку Апостальскай Сталіцы апублікавала праграму падарожжа Бэнэдыкта
XVI у Мексіку і на Кубу, якое пройдзе 23-29 сакавіка. Адзначаецца, што першым горадам,
які наведае Святы Айцец стане мексіканскі Леон (Гуанахуата). Тут Пантыфік сустрэнецца
з Прэзідэнтам Мексікі, а таксама правядзе сустрэчу з групай дзяцей на плошчы Дэла
Паз. У нядзелю, 25 сакавіка, Бэнэдыкт XVI узначаліць св. Імшу, якая пройдзе ў парку
200-годдзя Леона, а вечарам малітву нешпараў, у якой прымуць удзел біскупы Мексікі
і краін Лацінскай Амерыкі. Малітва адбудзецца ў катэдральным касцёле Найсвяцейшай
Панны Марыі дэлла Люсэ ў Ліоне.
У панядзелак, 26 сакавіка, Папа накіруецца
ў Санцьяга дэ Куба, адзін з самых вялікіх гарадоў Кубінскай Рэспублікі. Тут, на гарадской
плошчы Антоніо Масэя Святы Айцец узначаліць св. Імшу з нагоды 400-годдзя адшукання
скульптуры Панны Марыі з Карыдад дэль Кобрэ, санктуарый якой Папа наведае на наступны
дзень. Таксама 27 сакавіка Пантыфік прыбудзе ў сталіцу Кубы Гавану. У мясцовым Палацы
Рэвалюцыі Папа сустрэнецца са старшынёй Дзяржаўнага Савета і Савета Міністраў Рэспублікі.
Бэнэдыкт XVI закончыць дзень супольнай вячэрай з кубінскімі каталіцкімі іерархамі
ў будынку Апостальскай нунцыятуры.
28 сакавіка на сталічнай плошчы Рэвалюцыі
Святы Айцец узначаліць св. Імшу, а пасля яе заканчэння накіруецца ў Нацыянальны аэрапорт
Хасэ Марці, дзе развітаецца з вернікамі і прадстаўнікамі ўладаў, а затым вылеціць
у Рым. 29 сакавіка каля 10.00 паводле рымскага часу Пантыфік прыбудзе ў рымскі аэрапорт
Чампіно.