Пасол Мексікі: візіт Святога Айца пакажа, які сёння каталіцызм у Мексіцы
Пасол Мексікі пры
Апостальскай Сталіцы Гектар Лінг Альтамірано заявіў, што яго краіна з энтузіязмам
чакае візіту Бэнэдыкта ХVI у сакавіку гэтага года. Ён адзначыў, што энтузіязм з’яўляецца
пацвярджэннем характару каталіцкай веры ў Мексіцы. “Гэты тып хрысціянства, моцна марыйны,
паважаючы Папу, Наступніка св. Пятра, уяўляе вялікую сілу для Мексікі, якая як і многія
іншыя краіны сур’ёзна змагаецца з праблемамі, напрыклад, эканамічным крызісам і насіллем”,
- сказаў дыпламат у інтэрв’ю нашаму радыё. Гектар Лінг Альтамірано падкрэсліў, што
вернікі з многіх куткоў краіны гатовыя праехаць больш за 2 тыс. км, каб сустрэцца
са Святым Айцом. Паводле яго, людзі ведаюць, што ў гэты адмысловы час трэба мець надзею,
каб перамагчы свае праблемы.
“На мой погляд, Святы Айцец дае гэту надзею праз
свае пасланні. Тое, што сапраўды важна для нас – гэта яго духоўная і фізічная блізкасць,
яго бясспрэчны маральны аўтарытэт, які прызнаецца ўсімі. У Мексіцы пражывае 87 млн.
католікаў, што складае амаль 83% усіх жыхароў краіны. Папа з’яўляецца для нас надзеяй,
“sursum corda”, які заклікае нас “падняць угору сэрцы” і больш не плакаць, але пачаць
працаваць разам у пераадоленні цяжкасцяў, як гэта ўжо адбывалася ў цяжкія часы для
нашай краіны”, - сказаў Гектар Лінг Альтамірано.
Пасол нагадаў, што адносіны
паміж Апостальскай Сталіцай і Мексікай былі ўстаноўлены ў 1992 г. і на сённяшні дзень
станоўча развіваюцца, гэта праяўляецца ва ўзаемным супрацоўніцтве ў вырашэнні міжнародных
пытанняў. “Я лічу, што візіт Святога Айца павінен стаць нагодай для глыбокага рэлігійнага,
сацыялагічнага і культурнага аналізу таго, што сёння прадстаўляе сабой каталіцкая
вера ў Мексіцы”, - падкрэсліў Пасол Мексікі пры Апостальскай Сталіцы.