Rusia në qendër të vëmendjes botërore, vetëm pak orë para mbledhjes së Këshillit të
Sigurimit të OKB-së, që duhet të diskutojë një rezolutë të re kundër regjimit sirian.
Pavarësisht nga presioni i kancelarive perëndimore, Moska duket se ka ndërmend të
vendosë veton. Zv.ministri i jashtëm, Genadi Gatilov nënvizoi, në një deklaratë për
shtyp, se “projektrezoluta mbi Sirinë nuk do të sjellë kompromis, por luftë civile”.
Kremlini propozoi dje të jetë ndërmjetësues në një dialog të mundshëm ndërmjet presidentit
Bashar al-Asad dhe opozitës siriane. Ndërkaq, gjendja në terren është nga më të
vështirat. Pasi denoncoi 100 viktimat e djeshme, ndër të cilat 55 civilë, opozita
mbajti sot një ditë “zie e zemërimi”, siç u quajt koha për të përkujtuar të vrarët
e “masakrave të egra” të regjimit në Homs. Ajo kërkoi ndërhyrjen e bashkësisë ndërkombëtare
dhe kërcënoi presidentin e familjen e tij se do të përfundojnë si lideri libian, Muhamar
Gedafi. Këshilli i Sigurimit i OKB-së do të mblidhet në orën 21.00 (me orën shqiptare).
Mbi tryezën e diskutimeve, projektrezoluta arabo-perëndimore, që përfshin kushtet
e Lidhjes Arabe. I pari ndër to, largimi nga pushteti i Asadit, në favor të zëvendësit
të tij. Nuk do të marrë pjesë ministri i jashtëm rus, Lavrov, i cili, për 24 orë rresht,
nuk pranoi telefonatën e sekretares amerikane të shtetit, Klinton, për të folur mbi
gjendjen siriane. Arsyeja: impenjime të shumta gjatë vizitës në Australi, ku ndodhet,
dhe pamundësia për të folur “nga ana tjetër e Oqeanit” për një çështje kaq delikate.