Piktorët L. Delija e I. Kodra “rikthehen” në atdhe për 100-vjetorin

Krijimet artistike të piktorëve shqiptarë Lin Delija e Ibrahim Kodra do të prezantohen për publikun shqiptar, nga Galeria Kombëtare e Arteve të Tiranës, në këtë vit jubile për Shqipërinë.
Në një intervistë për ATSH-në, drejtori i GKA-së, Rubens Shima, u shpreh se një pjesë e rëndësishme e kalendarit vjetor të Galerisë Kombëtare të Arteve janë projektuar brenda formatit të festimeve të 100-vjetorit të Pavarësisë, ku dy ekspozita të rëndësishme janë ato të Delisë dhe Kodrës.
"Lin Delija, i njohur në Shqipëri, por jo aq mirë i prezantuar, është ekspozuar herë pas here në ekspozita të vogla, ndërsa kësaj here, GKA do të organizojë një ekspozitë personale me veprat e tij më të mira", tha Shima.
Ekspozita e Lin Delisë, veprat e të cilit ekspozohen në Vatikan, Romë, Kanada, Gjermani, Nju Jork, etj do të vijnë në bashkëpunim me muzeun e tij në Itali. Duhet kujtuar se një numër i madhe të veprave të artistit Lin Delija ndodhën në qytezën italiane Antrodocco, jo larg Romës, pjesa tjetër e veprave të piktorit Shkdoran ndodhën ndër miq italian, e disa tjera ndër shqiptarë anë e mbanë botës.
Ndërkohë që ekspozita e Ibrahim Kodrës do të çelet në bashkëpunim me Fondacionin Kodra në Milano, ku një grup i GKA-së do të përzgjedh veprat më të mira të tij.
"Ajo që vlen të përmendet është që 50 % e veprave të Kodrës ndodhet në Tiranë, në pronësi të koleksionistëve shqiptarë dhe 50 % e ekspozitës në GKA do të jetë me veprat e këtyre koleksionistëve dhe pjesa tjetër do të jetë nga Fondacioni Kodra", tha drejtori i GKA-së, Shima.
Sipas tij, një tjetër projekt i GKA-së, për 100 vjetorin e pavarësisë, është dhe ekspozita me fotografi si një proces dokumentimi i ngjarjeve para dhe pas Shpalljes së Pavarësisë.
"Nga Arkivi i Shtetit dhe arkivi i Fototekës "Marubi" do të përzgjidhet kjo periudhë historike dhe përmes dëshmisë fotografike do të përcillet atmosfera, mentaliteti, gjendja, personazhet që krijuan dhe shpallën pavarësinë", tha Rubens Shima.