Papa në audiencën e përgjithshme: bashkimi i të krishterëve duhet të duket me gjithë
qartësinë e vet në histori.
“Bashkimi i të krishterëve duhet të shfaqet me gjithë qartësinë e vet në histori,
që bota të besojë”: këtë theksoi në mënyrë të veçantë Benedikti XVI në audiencën e
sotme të përgjithshme, mbajtur në Sallën e Palit VI në Vatikan. Ati i Shenjtë ia kushtoi
gjithë katekizmin lutjes, të cilën Jezusi ia drejton Atit në Orën e lumnimit të tij,
që të gjithë të jenë një gjë e vetme.Ora e lumnimit të Zotit,
që nisi me tradhtinë e Judës e arriti kulmin me ngjitjen e Krishtit të ngjallur tek
Ati, është diçka më tepër se lutje e deklaratë e gatishmërisë së plotë për të marrë
pjesë në Planin e Hyjit: “Atë natë Jezusi i drejtohet Atit në çastin kur
po flijonte vetveten. Ai, meshtar e fli, lutet për vetveten, për apostujt e për gjithë
ata, që do të besojnë në Të, lutet për Kishën e të gjitha kohëve”. Lumnimi,
që Jezusi i kërkon Atit për vetveten, shpjegoi Papa, është shprehje e bindjes më
të plotë ndaj Atit: “Kjo gatishmëri e kjo lutje janë akti i parë i meshtarisë
së re të Jezusit, i cili është dhurim i plotë mbi Kryq; e pikërisht në kryq lumnohet
akti i fundmë, më i larti, i dashurisë, sepse dashuria është lumturia e vërtetë, lumturia
hyjnore”. Çasti i dytë i kësaj lutjeje, është ndërmjetësimi i Jezusit
për dishepujt, që ishin me të: “Jezusi i thotë Atit: Ata nuk i përkasin
botës, sikurse unë nuk i përkas botës. Shenjtëroj në të vërtetën; Fjala jote është
e vërteta. Sikurse ti më dërgove në botë, po ashtu edhe unë i dërgova në botë; për
ta unë po e kushtoj vetveten, që edhe ata të shenjtërohen në të vërtetën”. Akti
i tretë i kësaj lutjeje meshtarake – kujtoi Papa - hap një horizont të pakufishëm,
deri në fund të fundit të kohëve: “Me të Jezusi i drejtohet Atit që
të vendosë në favor të atyre, të cilët do ta pranojnë fenë, përmes misionit të përuruar
nga Apostujt, mision që vijon në shtigjet e pafundme të historisë. Lutet, kështu,
për Kishën, lutet edhe për ne”. Kërkesa kryesore e lutjes meshtarake të
Jezusit, kushtuar dishepujve të Tij, është ajo e bashkimit të ardhshëm të të gjithë
atyre, të cilët besojnë në Të. Një unitet i tillë, nënvizoi Papa, nuk prodhohet nga
bota, por arrin tek ne nga Ati, përmes Birit e në Shpirtin Shenjt: “Bashkimi
i të krishterëve është realitet i fshehur në zemër të njerëzve, që besojnë. Por njëkohësisht,
duhet të duket me gjithë qartësinë e vet në histori. Duhet të duket, që bota të besojë,
duhet të duket, që të gjithë të jenë vërtet një gjë e vetme”. Duke kujtuar
se gjatë kësaj Jave, kushtuar lutjes për bashkimin e të krishterëve, gjithë besimtarët
e krishterë i lypën Zotit dhuratën e bashkimit të tyre të plotë, Papa nënvizoi, në
përfundim, se në lutjen meshtarake të Jezusit themelohet përfundimisht Kisha:“Kisha
lind nga lutja e Jezusit. Por kjo lutje nuk është vetëm fjalë: është akt, përmes të
cilit ai e ‘kushton’ vetveten, domethënë, e ‘flijon’ jetën e vet, për jetën e botës”.