Францыя: яўрэі і мусульмане правялі першы сумесны форум
Сённяшняя “L’Osservatore
Romano” інфармуе аб першай афіцыйнай сустрэчы у Парыжы паміж прадстаўнікамі мусульман
і яўрэяў Францыі. Яна праходзіла пад дэвізам: “Яўрэі і мусульмане – грамадзяне адной
краіны” і мела на мэце паспрыяць знішчэнню “сцяны недаверу і нянавісці паміж імі”.
Падчас форума яго удзельнікі выказалі надзею, што гэта мерапрыемства паспрыяе ўзаемнай
павазе паміж вызнаўцамі абедзьвух рэлігій і абароне агульных каштоўнасцяў, якія іх
аб’ядноўваюць. Ватыканскае выданне цытуе вялікага рабіна Францыі Жыля Бернхайма, які
паведаміў, што прыярэтэтам сваёй дзейнасці лічыць збліжэнне з мусульманамі. “Мы на
цвёрдай аснове агульных каштоўнасцяў хочам будаваць адносіны з мусульманамі і імкнемся
жыць разам у згодзе”, - сказаў рабін.
У сваю чаргу, мула вялікай мячэці Парыжа
Даліл Бубакёр, падкрэсліў, што антысемітызм і ісламафобія – гэта няшчасці, з якімі
трэба змагацца. “Іслам не з’яляецца антысеміцкім. Іслам у Францыі свядомы праблем,
якія існуюць і ў стане змагацца з імі з усёй сур’ёзнасцю і адкрытасцю, і жыць адпаведна
з духам часу”, - сказаў мула. Ён звярнуў увагу на тое, што звычайнымі ў Францыі сталі
напады на мячэці, сінагогі, прафанацыя могілак, цяжкасці на працы і ў школе, з якімі
сустракаюцца вернікі гэтых двух супольнасцяў. Бубакёр прапанаваў стварыць спецыяльную
камісію, якая садзейнічала б узаемапаразуменню паміж яўрэямі і мусульманамі.