Do të përfundojnë, në Bazilikën romake të Shën Palit jashtë mureve, kremtimet liturgjike
të Kohës së Krishtlindjes.
E ndoqëm Atin e Shenjtë më se një muaj me radhë në kremtimet e Kohës së Krishtlindjes,
që nisën me Kohën e Ardhjes, vijuan me kremtimet e mëdha të Natës së Kërshndellave;
Mesazhin dhe Bekimin ‘Urbi et Orbi’; Lutjet e para Mbrëmësore të Solemnitetit të të
Shenjtnueshmes Mari, Nënës së Zotit dhe ‘Te Deum’, lutja e falënderimit drejtuar Hyjit
në fund të vitit civil, më 31 dhjetor. Përfundoi kështu edhe një vit me Papën. Më
1 janar 2012, pastaj, e ndoqëm Benediktin XVI në Meshën Shenjte të Solemnitetit
të të Shenjtnueshmes Nënës së Zotit, e edhe në mesazhin papnor për Ditën e 45-të
Botërore të Paqes 2012. Është një ditë, ndikimi i së cilës, sipas dëshirës së Papës,
duhet të zgjasë tërë vitin, e prandaj Ati i Shenjtë vijon t’i ftojë të gjithë ta lexojnë
mesazhin e të thellohen në kuptimin e fjalëve, që përbëjnë titullin e tij: “Të
edukohen të rinjtë me frymën e drejtësisë e të paqes”. Benedikti XVI vijoi
të kryesojë kremtimet e Solemnitetit të Dëftimit të Zotit e të Pagëzimit të Zotit.
Deri tek takimi i fundit, të mërkurën, më 25 janar, në orën 17.30, në solemnitetin
e Kthimit të Shën Palit. Benedikti XVI do të përfundojë Javën e Lutjes për Bashkimin
e të Krishterëve, duke kryesuar Lutjet Mbrëmësore në Bazilikën romake të Apostullit
të Popujve jashtë Mureve.