Харватыя: біскупы заклікаюць прыняць удзел у рэферэндуме
22 студзеня ў Харватыі пройдзе Рэферэндум аб уваходзе ў члены Еўрасаюза. Пры станоўчым
выбары краіна стане чарговым членам ЕС ад ліпеня 2013 года. З нагоды выбараў Канферэнцыя
біскупаў Харватыі скіравала да вернікаў і суграмадзян заклік адкінуць страхі і глядзець
з надзеяй у будучыню, агульную для ўсіх еўрапейскіх народаў. Каталіцкія лідэры прыпамінаюць
усім аб натхненні, якое выпрабавала нацыя ў час візіту ў краіну папы Бэнэдыкта XVI
ў ліпені 2011 года. Пры сутрэчы з журналістамі на борце самалёта Святы Айцец тады
сказаў: “Працэс уваходу ў Еўропу – гэта ўзаемаабмен: даваць і атрымліваць. Таксама
і Харватыя дае са сваіх чалавечых і эканамічных здольнасцяў, але, натуральна, і атрымлівае
– пашыраючы так далягляды і жывучы ў гэтым вялікім камерцыйным коле, ня толькі эканамічным,
але перш за ўсё культурным і духоўным.”
Біскупы заклікаюць вернікаў і ўсіх
грамадзян менавіта на базе гэткага духу зрабіць свой выбар у адпаведнасці з крытэрамі
ўласнага сумлення. “На працягу стагоддзяў Касцёл суправаджаў нашу нацыю, падзяляючы
яе лёс і, разам з усімі адказнымі грамадзянамі, жадае зразумець, ці мы ёсць на ўзроўні
глядзець у будучыню з надзеяй у складзе гэтага новага грамадства – Еўрапейскага Саюзу”,-
адзначаюць іерархі. Біскупы падкрэсліваюць, што ня хочуць уплываць на выбар, але касцёльная
супольнасць, як Маці і Настаўніца, дапамагае кожнаму народу будаваць грамадства на
аснове гуманных і хрысціянскіх прынцыпаў.