Папе прадставілі двух ягнятак, з воўны якіх будуць зроблены паліі
21 cтудзеня Каталіцкі Касцёл адзначае літургічны успамін св. Агнесы, маладой рымлянкі,
якая аддала жыццё за Хрыста на рубяжы ІІІ-ІV ст. Ужо ў IV стагодзі ў Рыме была ўзведзена
ў яе гонар базыліка, якая ў VII ст. была перабудавана і ў такім выглядзе збераглася
да нашых дзён.
Штогод ў дзень успаміну св. Ангесы, якую заўсёды паказваюць
на выявах з ягняткам на руках, Святому Айцу прадстаўляюць двух ягнятак, якія раней
былі благаслаўлёныя ў базыліцы св. Агнесы. 21 студзеня студзеня ў капліцы папы Урбана
VII ў Апостальскім палацы ў Ватыкане адбылася цэрымонія ўручэння Бэнэдыкту ХVI гэтых
ягняткаў. З іх воўны робяць так званыя “паліі”, якімі Святы Айцец адорвае новых арцыбіскупаў-мітрапалітаў
29 чэрвеня, на свята святых апосталаў Пятра і Паўла. Палій арцыбіскупаў сімвалізуе
паслухмянасць Папе і іх асаблівую блізкасць да Святога Пасаду.
Палій – гэта
элемент літургічнага адзення ў выглядзе вузкай стужкі з белай авечай воўны з вышытымі
воўнаю чорнымі крыжамі; на канцах -з абшытымі чорным шоўкам кавалачкамі свінца. Насіць
палій мае права Святы Айцец, падчас кожнай літургіі, а таксама адзначаныя асаблівым
гонарам іерархі Касцёла, але толькі на вялікія святы.