Si sot 92 vjet më parë çeli punimet Kongresi i Lushnjës në të cilin u miratua një
akt kushtetues për pavarësinë e plotë të Shqipërisë me kryeministër Sulejman Delvinën. Ky
kongres, u mbajt në shtëpinë e patriotit lushnjar Kaso Fuga dhe aty morën pjesë delegatë
të zgjedhur nga e gjithë Shqipëria. Qëllimi i tyre ishte studimi i situatës së brendshme
e të jashtme të vendit dhe masat që duhet të merreshin për shpëtimin e Shqipërisë. Kongresi
jo vetëm miratoi aktin kushtetues për pavarësinë e plotë të Shqipërisë, por zgjodhi
Këshillin e Lartë prej 4 vetash, që do të kryente funksionet e kryetarit të shtetit
dhe një Këshill Kombëtar me 37 veta. Mbas ceremonisë së hapjes, u bë ndarja e deputetëve
nëpër grupe (komisione) të ndryshme, të cilat filluan nga puna menjëherë. Në
mbledhjen e dytë të Kongresit, e cila u mbajt më datën 28 janar, u zgjodh si Kryetar
i Kongresit Aqif Pashë Elbasani, ndërsa në mbledhjen e tretë vendosi mbas shumë diskutimesh
që të bëheshin protestat më të ashpra, kundër vendimit të Fuqive të Aleatëve, për
zbatimin e Paktit të fshehtë të Londrës, i cili ishte mbajtur më 26 prill të vitit
1915-të, pakt i cili sanksiononte copëtimin e Shqipërisë. Pas këtij vendimi, mbledhja
analizoi qëndrimin e qeverisë së Durrësit, si në situatën e brendshme, ashtu dhe në
atë të jashtme. Nga kjo analizë u nxor si konkluzion se ajo qeveri kishte dalë dhe
kishte vepruar jashtë programit të dhënë prej Kongresit të Durrësit, që ishte mbajtur
në 25 dhjetor të vitit 1918-të. Po ashtu ajo qeveri ishte përpjekur me çdo kusht për
ta penguar mbajtjen e Kongresit të Lushnjës. Për këtë arsye, kongresi vendosi unanimisht
rrëzimin e qeverisë së Durrësit, e njëkohësisht zgjodhi imzot Luigj Bumçin, Mehmet
Konicën dhe Dr. Turtullin, si përfaqësues legjitimë të popullit shqiptar, në delegacionin
e Konferencës së Paqes në Paris. Pas zgjedhjes së Sulejman Delvinës kryeministër,
në atë qeveri u zgjodhën dhe Ministër i Brendshëm Ahmet Zogu, Ministër i Punëve të
Jashtme Mehmet Konica, Ministër i Drejtësisë Hoxhë Kadria, Ministër i Financave Ndoc
Çoba, Ministër i Arsimit Sotir Peci, Ministër i Luftës Ali Riza Kolonja, Drejtor
i Përgjithshëm i Punëve Botore Eshref Frashëri, dhe Drejtori Përgjithshëm i Postë-telegrafave
Idhomene Kosturi. Në mbledhjen e pestë që u mbajt më 31 janar pasdite, kongresi
zgjodhi anëtarët e Senatit dhe u vendos që delegatët të mos shpërndaheshin derisa
qeveria të merrte në dorë frenat e shtetit. Pas kësaj mbledhje, atë pasdreke të 31
janarit të vitit 1920-të, kongresi u dha fund punimeve të tija, duke vendosur Tiranën,
për kryeqytet të Shqipërisë.