Беларускія сацыёлагі: 60% – колькасць веруючых у краіне

Большасць жыхароў Беларусі – веруючыя людзі. Гэта дадзеныя апошняга сацыялагічнага апытання, праведзенага ў краіне. На пытанне “ці лічыце вы сябе веруючым чалавекам?”, станоўча адказалі 39% апытанных, яшчэ 33% – хутчэй адносяць сябе да ліку веруючых, чым не. І толькі 3% заявілі аб атэістычнай пазіцыі. Як кажуць сацыёлагі, у свеце няма такога регіёну, дзе б увогуле не было веруючых. Рост цікавасці да рэлігіі ў Беларусі пачаўся ў 1990-я гады. Напрыклад, у 1994 г. веруючымі сябе прызнавалі каля 33%, а ў 1998 г. – ужо 50%. Сёння гэта лічба – 60% – яна крыху вагаецца, але ўжо некалькі гадоў утрымліваецца. Гэтае значэнне, па словах дацэнта факультэта філасофіі і сацыяльных навук Белдзяржуніверсітэта Святланы Карасёвай, павярхоўная і не зусім адлюстроўвае рэчаіснасць – пытанні ў анкетах звычайна размытыя, у іх увогуле не ўдакладняецца, што з’яўляецца аб’ектам веры.

“Сярод рэлігійных супольнасцяў лічбы таксама больш менш устойлівыяя – больш за 80% залічваюць сябе да праваслаўных, прыкладна 10-12%, таксама ў залежнасці ад года і пастаноўкі пытання, да католікаў, парадка 1% – да пратэстантаў. Вось такі расклад, і ён утрымліваецца. Гэта паказвае агульную светапоглядную пазіцыю, але лічбы нічога не кажуць пра тое, што значыць для сучаснага беларуса быць рэлігійным чалавекам”, - гаворыць Святлана Карасёва.

Менавіта гэтым даследваннем – распрацоўкай тыпалогіі рэлігійнасці беларусаў – і жадаюць заняцца сацыёлагі. Але ў адрозненні ад іншых, тут апытвацца будуць людзі, якія ўжо дэкларуюць сябе як веруючыя. Толькі так можна зразумець, якую ролю грае рэлігійнасць у жыцці чалавека. Менавіта так можна ставіць пытанне ў свецкіх, секулярных грамадствах.

“У такіх умовах быць рэлігійным – ужо нешта, гэта пазіцыя якая вылучае чалавека з агульнага кантэксту, з агульнага, секулярнага ўкладу жыцця. Можна быць прыхільнікам любога кшталту – фармальна, за кампанію, з іншых карыслівых меркаванняў, а можна верыць таму, што ты не можаш па іншаму – гэты сэнс становіцца часткай тваёй асобы, дыктуе стаўленне да людзей, жыцця і свету”, - лічыць сацыёлаг з Белдзяржуніверсітэта.

Такім чынам, пад кіраўніцтвам Святланы Карасёвай сацыёлагі хочуць зазірнуць глыбей у гэту праблему. Калі праца будзе зроблена, тады можна будзе лепш зразумець фенамен релігійнасці. А, магчыма, і душы сучасных беларусаў.

Ларыса Абрамчук, Мінск.