Papa, nxënësve të Kolegjit Almo Kapranika: kumtojeni Fjalën e Zotit, duke kapërcyer
çdo pengesë.
Në bazë të jetës së çdo meshtari, duhet të jetë lidhja tejet e ngushtë me Zotin: kjo,
porosia kryesore që i dha Papa Bashkësisë së Kolegjit Kapranika, pritur sot paradite
në Vatikan. Benedikti XVI i nxiti meshtarët e ardhshëm të impenjohen me guxim në veprimtarinë
e ungjillëzimit të ri. Më pas u kujtoi figurën e ndritur të Shën Anjezes, Pajtore
e Kolegjit, i cili prej pesë shekujsh është një nga seminaret më të rëndësishme të
dioqezës së Romës.
Kisha pret
shumë nga impenjimi i meshtarëve të rinj në veprën e riungjillëzimit, pohoi Benedikti
XVI gjatë takimit me bashkësinë e Kolegjit Kapranika. Papa i inkurajoi seminaristët
e rinj që, duke u mbështetur fort mbi bukurinë e traditës së vërtetë e mbi bashkimin
e pandarë me Krishtin, ta përhapin këtë frymë në bashkësi, me vërtetësi e gëzim: “Duhet
ta kuptoni thellësisht historinë dhe traditën e Kishës! Fakti që jeni në Romë, është
dhuratë, që duhet t’ju bëjë ta ndjeni gjithnjë më fort, thellësinë e traditës katolike”. Afërsia
me Pasardhësin e Shën Pjetrit, gjatë formimit tuaj, vijoi Papa, ju krijon kushtet
për t’i perceptuar me qartësi të veçantë përmasat universale të Kishës dhe dëshirën
që Ungjilli i Krishtit të arrijë në të katër anët e rruzullimit, duke hapur shtigjet
të reja e duke pushtuar zemra të reja njerëzish e popujsh. Në Kolegjin tuaj, vijoi,
i keni të gjitha mundësitë të hapni horizonte të reja, me frymëmarrje ndërkomëbtare: “Përgatituni
për t’iu afruar çdo njeriu, që takoni, duke punuar në një mënyrë të tillë, që asnjë
kulturë të mos jetë pengesë për Fjalën e Jetës, të cilën e kumtoni me fjalën e, sidomos,
me jetën tuaj”. Natën e festës së Shën Anjezes, Pajtore e Kolegjit, Papa
i ftoi meshtarët e ardhshëm të ndjekin shembullin e martirizmit e të virgjërisë së
Vashës romake, në se duan të jenë dëshmitarë të vërtetë e të besueshëm të fesë: “Formimi
i meshtarit kërkon ndershmëri, përkryerje, ushtrim asketik, qëndrueshmëri e besnikëri
heroike, në të gjitha aspektet: në bazë të këtij formimi, është jeta e thellë shpirtërore,
e frymëzuar nga lidhja e ngushtë me Zotin, në nivelin personal e në atë të bashkësisë,
me vëmendje të veçantë ndaj kremtimeve liturgjike e ndjekjes së vazhdueshme të sakramenteve”. Në
vijim, Papa shtoi se jeta meshtarake kërkon ecje të përhershme në rrugën e shenjtërisë.
E, për t’i shërbyer më mirë Kishës, meshtarët kanë nevojë edhe për formim serioz
njerëzor, kulturor e shpirtëror. Prej këndej, secili duhet të punojë shumë për krjimin
e kulturës personale, fryt i studimit të pasionuar e të vazhdueshëm. Feja, vërejti
Benedikti XVI, ka një përmasë racionale dhe intelektuale, që është themelore për çdo
meshtar. Pastaj kujtoi edhe lidhjen ndërmjet Shën Anjezes, martire nën Domicianin,
dhe qytetit të Romës: “Edhe sot e kësaj dite, atij që kalon nëpër
Sheshin Navona, figura e Shenjtores, nga lartësia e ballinës të Kishës së Shën Anjezes
në Agone, i kujton se qyteti ynë bazohet edhe mbi miqësinë me Krishtin e mbi dëshminë
e shumë prej bijëve e bijave të tij”.
Kujtojmë se historia
e Kolegjit lidhet ngushtë me emrin e kardinalit Domeniko Kapranika (1400-1458)
i cili, me aktin e 5 janarit 1457, themeloi në Romë një seminar me emrin e familjes
së tij, kushtuar tërësisht formimit sakramentor, karitativ e baritor të meshtarëve
të ardhshëm. Kishte për qëllim t’i ofronte shoqërisë së kohës, një kler më të përgatitur
në aspektin kulturor e shpirtëror, frymë që vijon edhe sot e kësaj dite në jetën e
Kolegjit. Me bazë të shëndoshë ekonomike, siguruar nga themeluesi, e me seli në pallatin
e lashtë Kapranika, pranë Kishës së Shën Marisë në Akuirio, Kolegji fitoi pavarësi
financiare, që nga themelimi e deri në shekullin XX. Titulli ‘almo’ (që jep jetë)
i Kolegjit, kujton ata eprorë e nxënës që, gjatë plaçkitjes së Romës nga lancikenekët
protestantë, më 1527, flijuan jetën për mbrojtjen e Papës. Kolegji, ku përgatiten
nuncët e ardhshëm apostolikë, diplomatë të Selisë së Shenjtë, ka një bibliotekë tepër
të pasur me inkunabuli, dorëshkrime e libra të rrallë, në bazë të së cilës është biblioteka
e Kardinalit themelues. Ndërmjet qindra nxënësve të tij, meshtar e ipeshkvij të njohur
në historinë e Kishës, janë edhe dy papë: Benedikti XVI e Piu XII.