Լիբանանի Հայ Առաքելական, Կաթողիկէ եւ Աւետարանական յարանուանութիւններէն, հայ քաղաքական
երեք կուսակցութիւններէն` ՀՅԴ-էն, ՌԱԿ-էն եւ ՍԴՀԿ-էն, ինչպէս նաեւ Լիբանանի Հայ Դատի
մարմինէն եւ Հայոց Ցեղասպանութեան 100-ամեակի Լիբանանի կեդրոնական մարմինէն ներկայացուցիչներ
երէկ այցելեցին Լիբանանի մէջ Ֆրանսայի դեսպանատուն, ուր հանդիպում ունեցան Լիբանանի մէջ
Ֆրանսայի դեսպանի առաջին խորհրդական Տիտիէ Շապերի եւ դեսպանի երկրորդ խորհրդական Սելին
Փլասի հետ: Հայկական պատուիրակութիւնը Ֆրանսայի խորհրդարանին կողմէ Հայոց Ցեղասպանութեան
ժխտումը քրէականացնող օրինագիծի որդեգրման համար լիբանանահայութեան գոհունակութիւնը փոխանցեց`
յոյս յայտնելով, որ Ֆրանսայի ծերակոյտը եւս 23 յունուարին նախատեսուած իր նիստին ընթացքին
հետեւի խորհրդարանի օրինակին: Հայկական պատուիրակութիւնը այս հարցով ֆրանսացի դիւանագէտներուն
յանձնեց Լիբանանի մէջ Ֆրանսայի դեսպան Տընի Փիեթոնին ուղղուած յուշագիր մը, որ կը նշէր,
թէ «ժխտողականութեան դէմ պայքարը արդար պայքար մըն է եւ քաղաքական կամ ընտրական հաշիւներու
հարց մը չէ»: Յուշագիրը կ՛ընդգծէր, որ նշեալ օրինագիծին որդեգրումով «արդարութիւնը
յաղթանակեց»` աւելցնելով, որ Թուրքիա պէտք է ճանչնայ Հայոց Ցեղասպանութիւնը եւ նկատի
ունենայ, որ տնտեսական շանթաժներն ու քաղաքական սպառնալիքները չեն կրնար հայկական հոսած
արեան եւ Ֆրանսայի Հանրապետութեան սկզբունքներուն դիմաց ծանր կշռել։