Papa në audiencën e përgjithshme: ekumenizmi, përparësi e Kishës; të krishterët, më
bindës, në se bashkohen.
Bashkimi i të krishterëve është detyrë e mbarë Kishës dhe e gjithë të pagëzuarve.
Kështu u shpreh Papa sot paradite në audiencën e përgjithshme, mbajtur në Sallën e
Palit VI, në Vatikan, plot me besimtarë. Papa vuri theksin pikërisht mbi Javën e Lutjes
për Bashkimin e të Krishterëve, sivjet me temë: “ Të gjithë do të shndërrohemi nga
fitorja e Jezu Krishtit, Zotit tonë”. Benedikti XVI pohoi me forcë se mungesa e bashkimit
ndërmjet të krishterëve e pengon kumtimin e Ungjillit. Më pas bëri një pyetje, drejtuar
gjithë të pagëzuarve, që shqetësohen për fatet e ungjillëzimit: “E si mund të japim
dëshmi bindëse, në se jemi të përçarë?”. Duke u nisur nga
tema e Javës për Bashkimin e të Krishterëve, Benedikti XVI u ndal tek historiku i
kësaj nisme, lindur më 1908, thelluar më tej përmes mësimeve të Koncilit II të Vatikanit
për bashkimin e të gjithë dishepujve të Krishtit: “Ky takim shpirtëror,
që i bashkon të krishterët e të gjitha traditave, na bën edhe më të vetëdijshëm se
uniteti, drejt të cilit shkojmë, nuk do të arrihet vetëm me përpjekjet tona, por do
të jetë dhuratë, që vjen nga lart, për të cilën duhet të lutemi vazhdimisht”. Duke
kujtuar se tema e Ditës sivjet u propozua nga një grup ekumenik polak, Ati i Shenjtë
kujtoi se historia e këtij vendi njohu bashkëjetesën demokratike, lirinë fetare, por
pa edhe pushtime e provoi shumë disfata, pa e pushuar kurrë luftën kundër shtypjes,
me etjen e pashuar për liri. Prej këndej, refleketimi mbi kuptimin e dy fjalëve, me
rëndësi të dorës së parë në jetën e njerëzve e të popujve: “fitore” e “disfatë”. Nga
fitoret kalimtare njerëzore, Papa kaloi tek fitorja përfundimtare e Krishtit, e vetmja
që mund ta shndërrojë njeriun. Kjo fitore nuk përshkohet nëpër rrugën e pushtetit
e të forcës, por nëpër atë të dashurisë, të shërbimit reciprok, të shpresës së re,
të ngushëllimit për njerëzit më të fundëm, më të harruar, më të poshtëruar, më të
papranuar: “Për gjithë të krishterët, shprehja më e lartë e këtij
shërbimi të përvuajtur, është vetë Jezu Krishti, dhurimi i plotë i tij, fitorja e
dashurisë së tij mbi vdekjen, që shkëlqen në dritën e agimit të Pashkëve. Ne mund
të marrin pjesë në këtë ‘fitore’ shndërruese, në se e lëshojmë plotësisht vetveten
në dorë të Zotit, që të na shndërrojë siç dëshiron, e në se impenjohemi për këtë shndërrim
të jetës sonë”. Benedikti XVI nënvizoi se bashkimi i plotë e i dukshëm
i gjithë të krishterëve, kërkon nga besimtarët të pendohen, të bëjnë kthesë e të
jenë gjithnjë më shumë një gjë e vetme me Krishtin. Bashkimi, për të cilin lutemi,
tha Papa, kërkon shndërrimin shpirtëror, si të bashkësisë, ashtu edhe të jetës vetjake
të secilit besimtar: “Nuk është thjesht fjala për përzemërsi apo për bashkëpunim,
duhet përforcuar feja jonë në Hyjin, në Hyjin e Jezu Krishtit, që na foli e u bë një
nga ne; duhet të hyjmë në jetën e re të Krishtit, që është fitorja jonë e plotë e
përfundimtare; duhet t’ia hapim zemrat njëri-tjetrit, duke bërë tonat të gjitha elementet
e unitetit, që Zoti i ka ruajtur për ne e na i dhuron vazhdimisht; duhet ta ndjejmë
thellë urgjencën për t’ia dëshmuar njeriut të kohës sonë Hyjin e gjallë, që u bë i
njohur në Krishtin”. Më pas Benedikti XVI vuri në dukje se Koncili II i
Vatikanit e vuri kërkimin e rrugës ekumenike në qendër të jetës e të veprimtarisë
së Kishës: Ky Koncil i shenjtë, i nxit të gjithë besimtarët katolikë që,
duke njohur shenjat e kohëve, të marrin pjesë me zell të madh në veprimtarinë ekumenike
(Unitatis redintegratio, 4). E i Lumi Gjon Pali II nënvizoi edhe natyrën themelore
të këtij impenjimi: “Ky unitet, që Zoti i dha Kishës së vet e në të cilin ai dëshiron
t’i përfshijë të gjithë, nuk është veprimtari ndihmëse, por vihet në qendër të gjithë
veprimtarisë së saj. Nuk ka vlerë të dorës së dytë në bashkësinë e dishepujve të saj.
Përkundrazi, ka të bëjë me vetë qenien e kësaj bashkësie”(Enc. Ut unum sint, 9). Detyra
ekumenike, prandaj, i përket mbarë Kishës, gjithë të pagëzuarve, kujtoi Papa, duke
i ftuar besimtarët e mbarë botës të punojnë me zell të përtërirë për fuqizimin e bashkimit,
tashmë ekzistues, ndërmjet të krishterëve, deri në bashkmin e tyre të plotë, në vërtetësi
e dashuri. Prandaj duhet pasur mirë parasysh që lutja për këtë bashkim të mos kufizohet
vetëm në këtë Javë, por të shikohet si pjesë përbërëse e lutjes së përditshme të të
krishterëve, në çdo vend e në çdo kohë: “Mungesa e bashkimit të të krishterëve
pengon kumtimin më të suksesshëm të Ungjillit, sepse shkatërron ose vë në rrezik besueshmërinë
tonë. E si mund të japim dëshmi bindëse, kur ne vetë jemi të përçarë? Natyrisht, përsa
u përket të vërtetave themelore, feja më shumë na bashkon, sesa na ndan. Por gjithsesi,
ndarjet mbeten, e kanë të bëjnë edhe me çështje të ndryshme praktike dhe etike, gjë
që shkakton pështjellim e mosbesim, duke e ligështuar aftësinë tonë për t’ua kumtuar
të gjithë njerëzve Fjalën shëlbuese të Krishtit”.Kujtojmë, në përfundim, se
Java e Lutjes për Bashkimin e të Krishterëve, me temë “Të gjithë do të shndërrohemi
nga fitorja e Jezu Krishtit, Zotit tonë”, nisi sot, e do të vijojë deri më 25
janarin e ardhshëm për t’u mbyllur me Lutjet mbrëmësore, kryesuar nga Benedikti XVI.