Gazeta ‘L’Osservatore Romano’: Papën mund ta kritikosh, por vetëm pasi ta kesh lexuar.
Pse mënyra si reflekton Papa Benedikti XVI, shprehur qartë në librat e në fjalimet
e tij, e, prej këndej, e lexueshme për këdo, që dëshiron ta kuptojë seriozisht si
teolog e si Papë, tepër shpesh lexohet e nuk shikohet me syrin e njeriut, i cili
dëshiron më të vërtetë të zbulojë origjinalitetin dhe risinë që ka? Pse çdo gjë, që
Papa thotë, u dashka të hyjë medoemos në skemat bajate të progresistëve ose të konservatorëve?
Pyetjet, lidhur me studimet kritike të fundit që i janë adresuar Papës Jozef Ratcinger,
siç është vepra e fundit, me titullin: “Kisha e antikoncilit. Tradicionalistët ripushtojnë
Romën”, i bëri gazeta vatikanase “L’Osservatore Romano” e 4 janarit të kaluar. Kritika
që Giovanni Miccoli i bënë Ratcingerit në veprën e përmendur, duke e akuzuar atë për
mungesë të vëmendjes ndaj historisë e për refuzimin e marrjes parasysh të realitetit,
për profesoreshën Skarafia është krejtësisht e pathemeltë e nuk qëndron aspak, sepse
kushdo që ka lexuar të paktën një vepër të Papës Ratcinger, nuk mund të jetë i paaftë
të pranojë e të vlerësojë që teologu sot Papë përherë ka treguar një vëmendje e një
shqyrtim të jashtëzakonshëm të çështjeve e të problemeve; përherë duke kërkuar, pastaj
në ndërhyrjet e tij, të na ofrojë një interpretim historik të momentin që jemi duke
jetuar, përplot me analiza e vështrime të aktualitetit si dhe të ndryshimeve që janë
në zhvillim e sipër. Të flasësh për kërkimin e së vërtetës e të akuzosh mendimin bashkëkohor
të relativizmit, me siguri, nuk do të thotë ta mohosh historinë. Do të thotë t’i japësh
historisë një interpretim që nuk i pëlqen autorit të librit, por kjo është krejtësisht
diçka tjetër. Editoriali i gazetës l’Osservatore Romane i datës 4 janar ‘Papa e
historia’, shkruar nga profesoresha Luçeta Skarafia, pedagoge e historisë bashkëkohore
pranë Universitetit romak ‘La Sapienza’, na kujton se të njëjtin fat pati edhe Papa
i Koncilit, Pali VI, me botimin e enciklikës ‘Humanæ Vitæ’. Të krijohet përshtypja
se vizioni skematik i politikës bashkëkohore mundohet ta errësojë mundësinë për një
interpretim të lirë që, natyrisht, mund të jetë edhe kritik, të kësaj papnie e cila,
sido që ta gjykosh, nënvizohet në artikull, duket gjithnjë më befasuese e më interesante.
“Sa vjet do t’u duhen historianëve për ta kuptuar këtë? Njëqind? Shpresojmë se jo”,
vijon profesoresha Skarafia, e cila zbërthen posaçërisht tezat e vëllimit, botuar
kohët e fundit, me titullin: “Kisha e antikoncilit. Tradicionalistët ripushtojnë Romën”,
shkruar nga Giovanni Miccoli për shtëpinë botuese Laterza. Një pretencë prokurori,
denoncon L’Osservatore Romano, realizuar përmes konsultimit të një mase tekstesh e
dokumentesh, bazuar mbi leximin e Koncilit II të Vatikanit, duke e parë atë si çast
i parë i shkëputjes nga tradita e patundur ultrakonservatore shekullore kishtare.
Për profesoreshën Skarafia, ky koncept i historisë, është të paktën i diskutueshëm,
e jo vetëm ai i Miccolit, por edhe i historianëve të tjerë të Kishës e në veçanti,
atyre të Koncilit të II të Vatikanit, të cilët, duke ecur në këtë rrugë, arrijnë,
me lehtësi të çuditshme, në përfundimin që u intereson më shumë: tradicionalistët,
me në krye Papën, po e rimarrin në dorë Kishën. Gjë që, duket qartë se nuk po ndodh.