Papa Trupit Diplomatik: nuk duhet ta humbasim guximin përballë krizës, por ta rimendojmë
rrugën e njerëzimit drejt paqes.
Në audiencë me trupin diplomatik pranë Selisë së Shenjtë, Papa kërkon respektimin
e jetës e të lirisë fetare, denoncon tragjedinë e të krishterëve të vrarë e të privuar
nga të drejtat themelore në shumë Vende. Kriza na imponon të reflektojmë mbi përmasën
etike të ekzistencës akoma më parë se mbi mekanizmat ekonomike.Për të
dalë nga kriza ekonomike e për t’i siguruar botës paqen, duhet vënë në qendër njeriu.
E pikërisht në fjalën “Njeri”, mund ta përmbledhim mesazhin e Benediktit XVI drejtuar
bashkësisë ndërkombëtare, në fillim të vitit 2012, duke pritur, sot paradite, në Sallën
Regia të Pallatit Apostolik, anëtarët e Trupit Diplomatik, të akredituar pranë Selisë
së Shenjtë. Papa mbajti një fjalim të gjatë e plot pasion, duke i prekur me radhë
të gjitha temat kryesore të aktualitetit ndërkombëtar.Kujtojmë se Selia e Shenjtë
ka marrëdhënie të plota diplomatike me 178 shtete. “Bota është e errët atje,
ku nuk ndriçohet nga drita hyjnore”, ky ishte filli i artë, që përshkoi tejembanë
arsyetimin e Benediktit XVI në fjalimin drejtuar Trupit Diplomatik. Papa e di se në
çastin aktual e gjithë shoqëria e ndjen veten të pafuqishme për të përballuar krizën.
Nënvizoi, në vijim, se kriza ekonomike-financiare botërore, vijon t’i dëmtojë rëndë
jo vetëm vendet në rrugë zhvillimi, por edhe ato më të përparuarat, në të cilat shumë
të rinj janë të çorientuar e të zhgënjyer. Prej këndej, ftesa e Papës për të mos e
humbur guximin e shpresën, por për ta riplanifikuar rrugën drejt së ardhmes”: “La
crise peut et doit… Kriza, ripohoi, mund e duhet të jetë nxitje e fuqishme
për të reflektuar mbi jetën njerëzore e mbi vlerën e përmasës së saj etike, para se
të reflektojmë për mekanizmat, që drejtojnë jetën ekonomike. Na duhen rregulla të
reja, që i sigurojnë të gjithëve mundësinë të jetojnë me dinjitet. Prej këndej, mendimi
i Atit të Shenjtë shkoi në Veriun e Afrikës e në Lindjen e Mesme, ku të rinjtë nisën
lëvizjen e ‘Pranverës arabe’. Optimizmit fillestar, shpjegoi Papa, ia zu vendin atmosfera
e pasigurisë, e pranimit të vështirësive në këtë çast tranzicioni, që hap para njerëzimit
një rrugë të re. E rruga më e përshtatshme e më e drejtë për Papën, është ajo, në
të cilën njihet plotësisht dinjiteti i paprekshëm i njeriut. Më pas e ftoi bashkësinë
ndërkombëtare të dialogojë me aktorët e proceseve në zhvillim e sipër, duke respektuar
plotësisht të drejtat e popujve, në përpjekjen për të ndërtuar shoqëri të qëndrueshme,
në të cilat mbretërojnë paqja e pajtimi”: “J’eprouve une grande
préoccupation… Papa shprehu shqetësimin e tij të thellë për ushtrimin e
dhunës në Siri, ku uroi të marrë fund një herë mirë gjakderdhja e të fillojë dialogu
i frytshëm ndërmjet palëve, i favorizuar edhe nga prania e vëzhguesve të pavarur.
Nuk harroi Ati i Shenjtë të vërë theksin edhe mbi dhunën, në rritje, në Nigeri, mbi
atentatet e kohëve të fundit në Irak; tensionet dhe ndeshjet në Sudanin Jugor, në
Bregun e Fildishtë, në Somali e në zonën e Liqeneve të Mëdha. Duke u ndaluar, pastaj,
në Lindjen e Mesme, uroi të rifillojë procesi i paqes në Tokën e Shenjtë, duke shprehur
kënaqësinë e tij për nismën e dialogut nga ana e Mbretërisë së Jordanisë. Palestinezët
e izraelitët, tha Papa, duhet të marrin vendime të guximshme e largapamëse, në dobi
të paqes. Një vëmendje të dorës së parë, Ati i Shenjtë i kushtoi respektit për
lirinë fetare e cila, pohoi me forcë, është e para ndërmjet të drejtave të njeriut,
sepse shpreh realitetin themelor të tij. Tepër shpesh, kujtoi me kaqardhje, kjo e
drejtë vijon të kufizohet ose të vihet në lojë”: “Dans de nombreux pays… Në
shumë vende, vërejti në vijim, të krishterëve u mungojnë të drejtat më themelore,
si e drejta për të marrë pjesë gjallërisht në jetën publike. Në disa të tjera, pësojnë
sulme të egra kundër kishave e banesave të tyre. E nganjëherë, kur dhuna arrin kulme
të papara, detyrohen të braktisin vatrat e tyre e të ikin nga vendi, për ndërtimin
e të cilit dhanë jo pak ndihmesë. Papa kujtoi me emocion të thellë ministrin pakistanez
Shahbaz Bhatti, i cili luftoi me të gjitha forcat për të drejtat e pakicave, deri
në fundin tragjik të jetës së tij. Prej këndej, duke kujtuar edhe takimin e Asizit,
mbajtur tetorin e kaluar, Papa dënoi ashpër terrorizmin, që shpërdoron fenë, për t’iu
kundërvënë njeriut e njerëzimit. Një pjesë të mirë të fjalës, drejtuar Trupit
Diplomatik, akredituar pranë Selisë së Shenjtë, Benedikti XVI ia kushtoi edukimit
të të rinjve me frymën e paqes, duke ripohuar, sidomos, rolin e familjes në kryerjen
e kësaj detyre. Papa nënvizoi se politikat, që e dëmtojnë familjen, kërcënojnë dinjitetin
njerëzor e edhe vetë ardhmërinë e njerëzimit. Njëkohësisht, vijoi, edukimit të të
rinjve i kundërvihen masa, të cilat jo vetëm e lejojnë, por nganjëherë arrijnë deri
në atë pikë, sa ta favorizojnë abortin, për shkaqe leverdie, ose për arsye mjekësore
tejet të diskutueshme”: “J’accueille donc avec satisfaction… Shprehu,
më pas, kënaqësinë e tij për vendimin e Gjykatës së Lartë të Bashkimit Evropian, që
ndalon patentimin e qelizave burimore embrionale, si dhe për vendimin e Asamblesë
Parlamentare të Këshillit të Evropës, që dënon seleksionimin para lindjes. Një sinjal
inkurajues, vijoi Ati i Shenjtë, është vendimi i Gjykatës Evropiane të të Drejtave
të Njeriut, në favor të pranisë së Kryqit në klasat e shkollave italiane. E, duke
kujtuar pikërisht Italinë, posaçërisht, 150-vjetorin e bashkimit të vendit, Papa theksoi: “Les
relations entre Saint-Siège… Marrëdhëniet ndërmjet Selisë së Shenjtë e
Shtetit italian, historikisht, kaluan edhe çaste të vështira, sidomos pas bashkimit,
por, me kalimin e kohës, mbizotëruan harmonia e vullneti reciprok i bashkëpunimit
për të mirën e përbashkët. Prej këndej, Benedikti XVI uroi që Italia të vijojë promovimin
e marrëdhënieve të drejtpeshuara ndërmjet Kishës e Shtetit, duke u bërë, kështu, shembull,
edhe për kombet e tjera. Në pjesën përfundimtare të fjalimit, Papa vuri theksin tek
rëndësia e respektimit të gjithësisë, duke kujtuar fatkeqësitë e rënda të natyrës,
që dëmtuan kohët e fundit njerëz, popuj e kombe. Kujtoi veçanërisht, centralin bërthamor
të Fukushimës. Mbrojtja e ambientit, vërejti, lidhet ngushtë me luftën kundër varfërisë
dhe me atë kundër ndryshimeve klimaterike, që ndikojnë fuqimisht për zhvillimin e
gjithanshëm njerëzor.