Nigeria: liderët e të krishterëve flasin për spastrim etnik.
“Në Nigeri vijon spastrimi sistematik etnik e fetar”. Denoncimin e bëjnë liderët katolikë
e protestantë të vendit afrikan, viktima, prej ditësh, të agresioneve, që synojnë
t’i zhdukin të krishterët nga veriu i Vendit. Më se 40 të vdekur në 72 orë, ky është
bilançi i sulmeve kundër të krishterëve të veriut, katër ditë pas përfundimit të ultimatumit
të sektit islamik ‘Boko Haram’, pasuar nga masakrat më mizore. “Ikni, ose do të vriteni!”,
patën kërcënuar islamikët, që po planifikojnë rivendosjen e sharisë në shtetet e veriut,
me shumicë myslimane. “Terroristët po e përdorin fenë për të shtënë në dorë pushtetin”,
pohon në një intervistë dhënë kanalit “Vaticaninsider”, kryeipeshkvi i Lagos, imzot
Ogolie, ndërsa të krishterët, shton, nuk e ndjejnë veten të mbrojtur nga shteti, i
cili e ka treguar tashmë se nuk është në gjendje t’u krijojë kushte sigurie. Sulmet
e fundit janë ato të djeshmet në shtetin verilindor të Adamavës, ku autoritetet vendase
shpallën ndalimin e qarkullimit për 24 orë. Masë e pamjaftueshme, në një vend, që
ndodhet para greminës së luftës civile. Na e kujton këtë ndeshja e djeshme e milicëve
islamikë me forcat e policisë në qytetin Potiskum. Ndërkaq, presidenti nigerian, Goodluck
Jonathan, që më 1 janarin e kaluar shpalli gjendjen e emergjencës në disa nga shtetet
e Veriut. Foli edhe në televizion, për t’u shpjeguar nigerianëve shkaqet, që e shtynë
në marrjen e vendimit për ndërprerjen e subvencioneve shtetërore në prodhimin e naftës.
Një vendim në interes të Nigerisë, pohoi presidenti, që megjithatë, shkaktoi dyfishimin
e çmimit të naftës, duke nxitur protestat e sindikatave. Sot, i gjithë vendi u përfshi
në një grevë të përgjithshme, ndoshta, prolog i ngjarjeve më të rënda. Lutemi të mos
jetë kështu- pohojnë ipeshkvijtë.