Святая Зямля: сустрэча біскупаў ЗША і краін Еўрасаюза
7-12 студзеня ў Святой
Зямлі сабраліся біскупы з ЗША і краін Еўрапейскага Саюза, каб дапамагчы адчуць мясцовым
хрысціянскім супольнасцям большую салідарнасць паміж сабой і з цэлым светам. Кс. Пьетро
Філет, генеральны сакратар Асамблеі каталіцкіх ардынарыяў Святой Зямлі, у інтэрв’ю
агенцтву “SIR” расказаў, што пачатак такім сустрэчам даў тагачасны Лацінскі Патрыярх
Святой Зямлі архіепіскап Мішэль Саббах з мэтай спрыяць таму, каб мясцовыя Цэрквы адчувалі
блізкасць Касцёла”.
Студзеньская сустрэча пачалася з наведвання біскупамі
супольнасцяў і парафій па ўсёй тэрыторыі Святой Зямлі. 8 студзеня дэлегацыя прыбудзе
ў Наблус-Рафідыю, ў сіра-каталіцкую супольнасць Іерусаліма і ў Сектар Газа. “Мы атрымалі
дазвол на ўезд у Газу, дзе мясцовая парафія рыхтуецца да сустрэчы дэлегацыі з 8 біскупаў,
святароў і свецкіх на чале з Апостальскім нунцыем арцыбіскупам Антоніо Франко, - кажа
кс. Пьетро. - У панядзелак, 9 студзеня, Лацінскі Патрыярх Іерусаліма Фуад Туаль раскажа
высокім гасцям аб актуальным стане хрысціян у Святой Зямлі. Затым адбудзецца сустрэча
з удзелам дыпламатаў з розных краін”.
Праграма мерапрыемства прадугледжвае
таксама сустрэчы з прадстаўнікамі ізраільскага ўрада, з мэрам Хайфы, а таксама наведванне
грэка-мельхіцкага архіепіскапства і вёскі Iбілін у Галілеі, дзе пройдзе сустрэча з
юдэямі, мусульманамі, друзамі і бахаямі.