Бэнэдыкт ХVI: заходняя цывілізацыя здаецца згубіла накірунак і ідзе навобмацак
6 студзеня Святы Айцец
сустрэўся з вернікамі на малітве “Анёл Панскі”. У сваім кароткім разважанні Папа сказаў,
што свет не ў стане даць чалавецтву неабходнае святло, але Касцёл ахвяруе святло Евангелля
ўсім людзям добрай волі, кожнай краіны і культуры. “Дарагія браты і сёстры - сказаў
Папа. Сёння мы адзначаем урачыстасць Аб’яўлення Пана. Гэта вельмі старажытнае свята,
якое бярэ свой пачатак на хрысціянскім Усходзе і паказвае таямніцу аб’яўлення Езуса
ўсім людзям, якіх прадстаўляюць мудрацы, што прыбылі пакланіцца Каралю Юдэйскаму,
які нарадзіўся ў Бэтлееме, аб чым расказвае Евангелле паводле св. Мацвея (Мц 2,1-12).
Гэтае “новае святло”, якое запалілася ў ноч Божага Нараджэння (Прэфацыя пра Нараджэнне
Пана 1), сёння пачынае ззяць на ўвесь свет, як зорка, нябесны знак, які прыцягнуў
увагу Каралёў і кіраваў іх шляхам да Галілеі.
Для ўсяго перыяда Божага Нараджэння
і Аб’яўлення Пана характэрнай з’яўляецца тэма святла, якая звязана таксама з фактам,
што ў паўночным паўшар’і, пасля зімовага сонцастаяння, дзень пачынае быць даўжэйшым
за ноч. Але для ўсіх народаў важнымі з’яўляюцца словы Хрыста: “Я – святло свету. Хто
ідзе за Мною, той не будзе хадзіць у цемры, але будзе мець святло жыцця” (Ян 8,12).
Езус гэта святло, якое з’явілася на даляглядзе чалавецтва, каб асвятляць жыццё кожнага
з нас і весці ўсіх нас па шляху да канчатковай мэты нашай пілігрымкі, да зямлі свабоды
і супакою, у якой мы заўсёды будзем жыць у поўным адзінстве з Богам і паміж сабой.
Аб’яўленне
гэтай таямніцы збаўлення было даручана Хрыстом Касцёлу. Св. Павел пісаў: “Яна не была
адкрыта сынам чалавечым у мінулых пакаленнях, так як цяпер адкрылася святым апосталам
Ягоным і прарокам праз Духа. Гэта значыць, што і язычнікі з’яўляюцца сунаследнікамі
і членамі аднаго цела, і саўдзельнікамі абяцання ў Езусе Хрысце праз Евангелле (Эф
3,5-6). Запрашэнне, якое прарок Ісая скіраваў да святога горада Іерусаліма, можа быць
звернута і да Касцёла: “Устань, свяціся, Іерусаліме, бо прыйшло тваё святло, і слава
Пана ўзышла над табою. Бо вось цемра пакрые зямлю, і змрок — народы, а Пан узыдзе
над табою (Іс 60,1-2). І так, свет са сваімі рэсурсамі, не ў стане даць чалавецтву
неабходнае святло. Гэта мы бачым таксама і ў нашыя дні: заходняя цывілізацыя здаецца
згубіла накірунак і ідзе навобмацак. Але Касцёл, дзякуючы Божаму Слову, усё бачыць
праз гэты туман. Касцёл не дае тэхнічных вырашэнняў, але трымае зрок скіраваны да
сваёй мэты і ахвяруе святло Евангелля ўсім людзям добрай волі, кожнай краіны і культуры.
Гэта
таксама з’яўляецца місіяй прадстаўніцтваў Апостальскай Сталіцы пры урадах дзяржаў
і міжнародных арганізацый. Гэтай раніцай я меў радасць удзяліць біскупскае пасвячэнне
двум новым Апостальскім нунцыям. Даручым Панне Марыі іх служэнне, а таксама евангелізацыйную
дзейнасць Касцёла”.
Пасля малітвы “Анёл Панскі” Святы Айцец павіншаваў вернікаў
усходняга абраду са святам Божага Нараджэння, якое яны будуць адзначаць 7 студзеня.
“Няхай кожная сям’я і супольнасць напоўняцца святлом і мірам Хрыста Збаўцы”, - сказаў
Бэнэдыкт ХVI.