Papa në Solemnitetin e Dëftimit të Zotit: ipeshkvijtë, sipas shembullit të Mbretërve
Dijetarë, të jenë të përvuajtur e t’u prijnë besimtarëve kah drita e Krishtit.
Ashtu si Mbretërit Dijetarë të Lindjes, ipeshkvijtë duhet të jenë plot me guxim e
me përvujtëri. Është një nga porositë, që dha Papa në Meshën e sotme, kremtuar në
Bazilikën e Vatikanit, në Solemnitetin e Dëftimit të Zotit, solemnitet të cilin e
quajti “Festa e dritës”. Gjatë kremtimit, Ati i Shenjtë shuguroi dy ipeshkvij të rinj:
Nuncin Apostolik të Irlandës, imzot Çarl Xhon Braun dhe atë të Gjeorgjisë dhe Armenisë,
Marek Solzhinski. Në ritin e shugurimit, kryesuar nga Papa, bashkëkremtuan kardinajtë
Tarçizo Bertone e Jozef Uiljam Levada. Gjatë ritit, kandidatët i paraqiti kardinali
Mark Ojè, prefekt i Kongregatës për Ipeshkvijtë.
Shqetësimi
i zemrës përshkoi fund e krye reflektimin e Papës, kushtuar Mbretërve, Dijetarëve
të kësaj bote, që arrijnë në Betlehem, të udhëhequr nga kometa, për ta adhuruar Jezusin,
menjëherë pas barinjve, njerëzve me shpirt të thjeshtë. Të mëdhenj e të vegjël, mbretër
e shërbëtorë, njerëz të të gjitha kulturave e të të gjithë popujve, ngarendin kah
Foshnja, për ta pranuar si Zot. Mbretërit ishin njerëz të shkencës, tha Benedikti
XVI, që dëshironin të dinin gjithnjë më shumë, t’i jepnin përgjigje pyetjes së përjetshme
të njeriut e të mbarë njerëzimit: “Cila është gjëja, që vlen më tepër për zemrën njerëzore?”: “Ishin
njerëz me zemër të shqetë. Nuk kënaqeshin me atë që duket, që është e zakontë. Ishin
njerëz në kërkim të premtimit, në kërkim të Zotit. E ishin njerëz vigjilentë, të aftë
për t’i dalluar shenjat e Zotit, për ta kuptuar gjuhën e tij të urtë e ngulmuese.
Por ishin edhe njerëz guximtarë, e njëheresh, të përvuajtur, e; mund ta marrim me
mend se nuk shpëtuan as nga talljet, nga që po shtegtonin kah Mbreti i Judenjve, duke
përballuar, për këtë takim kaq të dëshiruar, pengesa, vështirësi, lodhje”. Lodhje,
që Mbretërit e mbartën pa u ankuar, sepse ishin në kërkim të së vërtetës, në sa vijonin
të shtegtonin në një udhe të gjatë e të paqartë. Të gjitha këto janë tiparet themelore
të shërbimit ipeshkvnor, theksoi Papa: “Edhe ipeshkvi duhet të jetë
njeri me zemër të shqetë, që nuk kënaqet me gjërat e zakonshme të kësaj bote, por
ndjek shqetësimin e zemrës, e cila e shtyn t’i afrohet shpirtërisht gjithnjë më tepër
Zotit, të kërkojë Fytyrën e Tij, ta njohë gjithnjë e më shumë, ta dojë gjithnjë më
tepër”. Zemra e ipeshkvit duhet të jetë jo vetëm e shqetë, por edhe vigjilente,
e aftë për ta dalluar atë që duket, nga ajo, që është e vërtetë. Ipeshkvi, shtoi Benedikti
XVI, duhet të ketë përvujtërinë të përulet para këtij Zoti, që u bë aq konkret e
aq i thjeshtë, sa t’i kundërvihet kryelartësisë sonë të trashë, e cila nuk do e nuk
do ta shikojë Zotin, kaq pranë, e kaq të vogël: “Edhe ipeshkvi duhet të
jetë përplot me guxim e përvujtëri, njeri që nuk pyet ç’thotë për të opinioni sundues,
por ecën në rrugën e së vërtetës së Zotit e për të edhe impenjohet, pa u shqetësuar
në se shikohet si njeri i arsyeshëm apo i bezdisshëm”. E është edhe një
aspekt tjetër, mbi të cilin Papa nguli këmbë, duke nënvizuar karakteristikat e shërbimit
ipeshkvnor: lutja e vazhdueshme, që do të thotë të mos e humbasësh kurrë lidhjen e
ngushtë me Zotin, sepse vetëm ai, që e njeh personalisht Zotin, mund t’u prijë edhe
të tjerëve kah Ai i Lumi. Pastaj Benedikti XVI u rikthye tek zemra e shqetë, zemër
që, në fund të fundit, nuk kënaqet kurrë, me asgjë , përveç Zotit, e pikërisht kështu
bëhet zemër, që di të dojë: “Zemra jonë është e shqetësuar në përpjekjen
për të shkuar drejt Zotit, e mbetet e tillë, edhe pse sot me ‘narkotikët” shumë të
efektshëm, bëhen përpjekje për ta çliruar njeriun nga ky ankth. Por jo vetëm ne, qeniet
njerëzore, jemi të shqeta në lidhje me Zotin. Edhe zemra e Zotit është e shqetë, në
lidhje me njeriun. Zoti na pret! Zoti na kërkon”. Apostujt, nënvizoi Papa,
ishin të aftë ta mirëprisnin shqetësimin e Zotit për njeriun e t’ia çonin vetë Zotin
njerëzve e, prej këndej, ipeshkvijve u kërkohet të ecin në gjurmët e tyre; ta pranojnë
me gjithë zemër shqetësimin e Zotit, në mënyrë që dëshira e zjarrtë e Zotit për t’u
takuar me njeriun, të përmbushet plotësisht: “Ylli i madh, Ylli më i Ri,
që na prin, është vetë Krishti. Ai është, figurativisht, shpërthim i dashurisë së
Zotit, që e bën të shkëlqejë mbi botë vezullimin e zemrës së tij”. Kështu
Mbretërit Dijetarë u bënë “konstelacione të Zotit”. Në shpirtin e tyre, ashtu si në
shpirtin e shenjtorëve, takimi me fjalën e Zotit shkaktoi një shpërthim të vërtetë
drite, përmes së cilës, drita e vetë Zotit e ndriçoi mbarë botën. Ashtu si Dijetarët,
ipeshkvijtë janë të thirrur të jenë “yjet e Zotit" për njerëzit, t’u prijnë në udhën
drejt Dritës së vërtetë, drejt Krishtit. Duke pranuar shërbimin meshtarak e ipeshkvnor,
ata ndjekin Yllin Jezu Krisht: “Vultis ergo, fratres carissimi… Në përfundim të homelisë, Papa u dha sakramentin e shugurimit ipeshkvnor Nuncit
Apostolik të Irlandës, imzot Çarl Xhon Braun dhe atij të Gjeorgjisë dhe Armenisë,
Marek Solzhinski. Benedikti XVI u dorëzoi ipeshkvijve të rinj Ungjillin, mitrën
e shkopin baritor, simbole të shërbimit të tyre ipeshkvnor.