Սուրբերու դատի Ժողովի երբեմնի կառավարիչ Փորթուկալցի Կարտինալ Խօսէ Սարայվա Մարթինզը
6 յունուար 2012-ին կ՛ամբողջացնէ իր 80 տարեկանը։ Ընտրող Կարտինալներու թիւը այսպէսով
կ՛անցնի 108ի իսկ ոչ ընտրող կարտինալներու թիւը 84ի կը բարձրանայ։ Կարտինալ Խօսէ Մարթինզը
ծնած էր 6 յունուար 1932 -ին եւ 12 տարեկանին մտած էր փոքր ընծայարան ուր աւարտելէ ետք
իր դասնթացքները 22 օգոստոս 1950-ին կը կատարէ իր առաջին ուխտերը։ Կուսակրօն քահանայ
կը ձեռնադրուի 16 մարտ 1957ին անդամակցելով Հռոմի թեմին։ Ան եղած է Ուրբանեան համալսարանի
պատմական դասատուներէն մին ու 1998էն մինչեւ 2008-ը կառավարած է Սուրբերու դատի քահանայապետական
Ժողովը եւ իր օրով է որ 1999-ին երջանկայիշատակ ՅՊԲ. քահանայապետը, ֆաթիմայի մէջ երանելի
հռչակեց Մարթօ ընտանիքի երկու երիտասարդ զաւակները, ֆրանսիսքոն եւ Ճաչինդան։ Իր դաստիարակչական
ասպարէզի ընթացքին Կարտինալ Մարթինզը հրապարակած է աւելի քան 20 հատորներ եւ 250 յօդուածներ։ Ան
Կարտինալական աստիճանը ստացած է, 21 փետրուար 2001-ին, ՅՊԲ.ի օրով ու այսօր Լիզպոնի Պատրիարքին
հետ միասին, ան միակ Փորթուկալցի եկեղեցւոյ իշխանն է։