Սարքոզի Պաշշար Ասսատին Կոչ Կ՛ուղղէ Իշխանութենէն Հեռանալու։
Ֆրանսայի նախագահ Նիքոլա Սարքոզի յայտնեց, որ Սուրիոյ նախագահ Պաշշար Ասսատ պէտք է «իշխանութենէն
հեռանայ» եւ «իր ժողովուրդին արտօնէ վճռելու իր ճակատագիրը » աւելցնելով, որ Սուրիոյ
մէջ գործուած «սպանդները իրապէս անընդունելի են եւ գարշանք» կը պատճառեն: Սարքոզի
յայտնեց, որ «միջազգային ընտանիքը պէտք է դաժան բռնաճնշումները դատապարտելու ճամբով իր
պարտաւորութեանց տէր կանգնի»: Ան նաեւ շեշտեց արաբ դէտերու աշխատանքին համար անհրաժեշտ
պայմաններ ստեղծելու կարեւորութիւնը: Ֆրանսայի նախագահը ընդգծեց, որ միջազգային ընտանիքը
«պէտք է խստագոյն պատժամիջոցներու որդեգրման եւ մարդասիրական միջանցքի ապահովման ճամբով
իր պատասխանատուութեան տէր կանգնի»` վստահեցնելով, որ «առանց ձգձգելու այդ ուղղութեամբ
պիտի աշխատինք»: Իսկ Ֆրանսայի արտաքին գործոց նախարար Ալեն Ժիւփէ Սուրիոյ մէջ Արաբական
Լիկայի դէտերու առաքելութեան յստակացումը պահանջեց` անոր գործունէութեան նկատմամբ «կասկածներ»
յայտնելով: «Ճշմարտութիւնը պէտք է ամբողջութեամբ բացայայտուի, այլապէս վարչակարգը ի վերջոյ
պիտի յաջողի գետնի վրայ գտնուող դէտերը ապակողմնորոշել», ընդգծեց Ժիւփէ: Ժիւփէ նաեւ
ցաւ յայտնեց, որ Ռուսիա կը շարունակէ ՄԱԿ-ի Ապահովութեան Խորհուրդին մէջ Սուրիոյ նախագահ
Պաշշար Ասատի վարչակարգը դատապարտող որոշումի մը որդեգրումը արգելակել: Ան ըսաւ, որ «Ապահովութեան
Խորհուրդը չի կրնար (Սուրիոյ մէջ տեղի ունեցող իրադարձութեանց նկատմամբ) լուռ մնալ»: