՜՜2012-ը Աշխատանքի Տարի Պիտի Ըլլայ ՝՝ Կ՝ըսէ Նախագահ Սարգսեան Ամանորի Եւ Ս. Ծննդեան
Առթիւ իր Ուղղած Շնորհաւորական Ուղերձին Մէջ։
Հայրենի Նախագահը կ՝ըսէ . Ահա եւ պատմութիւն է դառնում 2011 թուականը: Նոր
տարին ընտանեկան տօն է: Տասներկուսի զարկերի հետ մենք մտովի ամփոփում ենք անցածը եւ բաժակ
բարձրացնում` նայելով իրար աչքերի մէջ: Ընտանիքներում, ինչպիսի սեղանների շուրջ էլ դիմաւորենք
Նոր տարին, իրար նեցուկ լինելու խոստում կայ իւրաքանչիւրիս մտքում: Երկիրն էլ մեր բոլորի
ընտանիքն է: Որտե՞ղ ենք դնում վերջակէտ ու ի՞նչ նպատակներով ենք անցնում Նոր տարուայ
սահմանագիծը: Որքան էլ տարբեր կողմերից նայենք, մէկ է` մեր նպատակները նոյնանում
են, (կ՝ըսէ հայրենի նախագահը) երբ ասում ենք հայրենիք, Հայաստան, Արցախ, սփիւռք, խաղաղութիւն,
ծնող, զաւակ։ Եկէ՛ք մեր մտքում ամբարենք անցած տարուայ մեր յաջող գործերն ու յաղթանակները`
հպարտ ու փայլող շարասիւները. անցած տարում թողնենք անտարբերութիւնը, թշնամանքը… նոր`
2012 թուական տանենք իրար նեցուկ լինելու խոստումը եւ նոր յաղթանակների վճռականութիւնը`
ի բարօրութիւն մեր հայրենիքի` Հայաստանի, Արցախի, սփիւռքի, յանուն խաղաղութեան ու արարման,
յանուն մեր ընտանիքների, ծնողների, երեխաների, յանուն սահմանին կանգնած մեր որդիների: Ներկայ
Հայաստանում շատ բան անկատար է։ Անկասկած, մենք պիտի դառնանք այն երկիրը, որտեղ ամէն
քայլափոխի զգացուի, թէ ովքեր ենք մենք, ինչ մեծ ու հարուստ աւանդոյթների ու քաղաքակրթութեան
հետնորդներ ենք: Այս առումով 2012 թուականը նոյնպէս պէտք է լինի յամառ աշխատանքի տարի.
միայն աշխատանքով է հնարաւոր բժշկել, խնամել, հոգ տանել ու յարմարաւէտ դարձնել կեանքը:
2012-ը աշխատանքի՛ տարի է լինելու: Ինչպէս գիտէք, գալիք տարի նաեւ անցկացուելու են
Ազգային ժողովի ընտրութիւններ: Մենք մտնում ենք ոչ միայն Նոր տարի, այլեւ մեր երկրի
ու հասարակութեան զարգացման նոր փուլ: Հաւատում եմ, որ արձանագրելու ենք նոր ձեռքբերումներ
մեր պետութեան ու հանրութեան գործունէութեան բոլոր ասպարէզներում: Շնորհաւորում եմ
ձեզ Ամանորի եւ Ս. Ծննդեան տօների առթիւ: Մաղթում եմ, որ այս օրերին տօնական սեղանների
շուրջ իշխեն բարձր տրամադրութիւնն ու լաւատեսութեան ոգին: Թո՛ղ Նոր տարին խաղաղութիւն
եւ բարօրութիւն բերի ձեր ընտանիքներին ու մեր երկրին: Շնորհաւո՛ր Նոր տարի: