Në primaret amerikane në Iowa, Romney fiton për pak vota më shumë se Santorum
Në SHBA-të, Mitt Romney fitoi etapën e parë të garës republikane për në Shtëpinë e
Bardhë. Në zgjedhjet paraprake të partisë në Ioua - shteti i parë ku dje u zhvilluan
primaret – ish-guvernatori i Masaçusets mori vetëm 8 vota më shumë se ish-senatori
i Pensilvanisë, Rick Santorum. Gjithsesi, Romney është gjithnjë e më i favorizuar
si kandidat kundërshtar i Barak Obamës, për zgjedhjet presidenciale të 6 nëntorit.
Komentojmë rezultatin e Iouas me amerikanistin e Universitetit të Gjenovës në Itali,
prof. Ferdinando Fasce: Kjo është një e dhënë interesante, pasi konfirmon kërkimin
e vështirë të një kandidati të pranueshëm për të gjithë republikanët. Njëkohësisht,
tregon ndeshjen ndërmjet njërit krah, atij të Romney-t, i cili përpiqet të arrijë
qendrën, edhe pjesërisht, dhe krahut më konservator, që është ai i Rick Santorum. Rick
Santorum katolik, Romney mormon, rëndësia e votave të ungjillorëve… Feja është gjithnjë
në plan të parë në zgjedhjet amerikane? Sigurisht feja është në qendër të krejt
jetës amerikane, prandaj edhe në qendër të politikës, siç ka qenë fuqishëm gjatë 30-40
vjetëve të fundit. Në këtë rast, nuk duhet të harrojmë se për Romeny-n, një nga problemet
është pikërisht feja e tij e veçantë, feja mormone, mjaft e theksuar. Problemi tjetër
është se ai vjen nga bota e financës, prandaj mund të jetë viktimë e ndonjë fushate
negative, që e sheh si njërin nga përgjegjësit e gjendjes së sotme financiare. Ekonomia
mbetet tema mbizotëruese e këtyre zgjedhjeve… Pa dyshim që po. Edhe gazeta
e sotme “Neë York Times” fliste për fushatë zgjedhore, që ka parasysh vendet e punës.
Duhet parë si do të shkojë ekonomia gjatë këtij viti e ky ka mundësi të jetë elementi
vendimtar.