Gjatë audiencës së përgjithshme Papa foli për kremtimet e Krishtlindjes, për atë shkëmbim
mahnitës e të madhërishëm ndërmjet hyjnores e njerëzores.
Të përhapen në mbarë botën drita dhe gëzimi i Lindjes së Krishtit: kjo ishte ftesa,
që Benedikti XVI u drejtoi më se 7 mijë shtegtarëve e besimtarëve, të pranishëm në
audiencën e parë të vitit 2012, mbajtur në Sallën e Palit VI, në Vatikan. Krishtlindja
kremton faktin historik të lindjes së Jezusit në Betlehem, kujtoi Papa, e është festa
në të cilën Zoti i dëfton njeriut dinjitetin e tij më të thellë, dinjitetin e Birit
të Hyjit. Nga njëra anë fshehja e Hyjit pas përvujtërisë së natyrës njerëzore,
në Foshnjën e Betlehemit; nga ana tjetër, dëftimi përmes mishërimit: dy realitete,
që i shohim qartë në dy solemnitete: atë të Krishtlindjes e atë të Dëftimit të Zotit.
Këtë nënvizoi Papa në audiencën e parë të përgjithshme të vitit të ri. Festa e Dëftimit
të Zotit, që do ta kremtojmë të premten e ardhshme, na kujton adhurimin e tre Mbretërve
Dijetarë, e, me që është dëftim, edhe Pagëzimin e Jezusit e Dasmën e Kanës. Benedikti
XVI e vuri theksin mbi dy aspekte, të dy festave të mëdha: mbi gëzimin e dritën. Gëzim
e mahnitje burojnë vetvetiu nga kundrimi i fytyrës së kësaj Foshnjeje të përvuajtur,
sepse e dimë që është Fytyra e Hyjit, e pranishme përgjithmonë në zemrën e njerëzimit;
fytyra e Zotit të ardhur për ne, që jeton me ne: “Krishtlindja është gëzim,
sepse, më në fund, shikojmë me sytë tanë e jemi të sigurtë se Zoti është e mira e
pambaruar, se është e vërteta, që ulet tek njeriu, për ta lartuar kah Vetja: Hyji
bëhet, kështu, i afërt, që të mund ta shikojmë e ta prekim”. Teologjia
dhe përshpirtëria e Krishtlindjes flasin për një shkëmbin mahnitës ndërmjet natyrës
hyjnore e asaj njerëzore: Hyji bëhet njeri, merr natyrën tonë, lind si ne, duke i
dëftuar, kështu, njeriut, dinjitetin e tij më të thellë: atë të birit të Zotit: “E
kështu ëndrra e njerëzimit, nisur në Parajsë – duam të jemi si Zoti – realizohet në
një mënyrë krejt të papritur, jo për shkak të madhështisë së njeriut, që nuk mund
të bëhet Zot, por për shkak të përvujtërisë së Zotit, që zbret nga qielli e hyn në
ne, me përvujtërinë e vet e na larton në madhështinë e vërtetë të qenies së Vet”. Është
një shkëmbim, tejet i prekshëm në Eukaristi. Ftesa e Izaisë profet: “Ngrehu, shkëlqe,
se po vjen drita jote; në dritën tënde do të ecin popujt, e mbretërit, në vezullimin
e shkëlqimit tënd”…”, i drejtohet Kishës, por edhe secilit nga ne, kujtoi Benedikti
XVI. E është ftesë për t’u bërë gjithnjë më të vetëdijshëm në misionin për ta përhapur
dritën e re të Ungjillit: “Ungjilli është dritë, që nuk duhet fshehur.
Duhet vënë lart e më lart. Kisha nuk është dritë, por merr dritën e Krishtit. E merr,
për të qenë e ndriçuar e për ta përhapur, me gjithë shkëlqimin e saj. E kjo duhet
të ndodhë edhe në jetën tonë personale”. Edhe sot, drita e Krishtit e davarit
errësirën e botës, kujtoi Benedikti XVI: “Të kremtosh Krishtlindjen do të
thotë t’u tregosh të gjithëve gëzimin, risinë, dritën, që solli kjo Lindje në të gjithë
jetën tonë, për të na bërë njerëz, që përhapin në botë gëzimin, risinë e vërtetë,
dritën e Zotit, duke ua dhuruar edhe të tjerëve”. Porosia kryesore e Benediktit
XVI është ta kumtojmë Ungjillin e ta pranojmë në zemrat tona këtë Foshnjë, për të
marrë jetë, nga jeta e Tij, për t’i bërë ndjenjat, mendimet, veprimet e Tij, ndjenjat,
mendimet, veprimet tona. Në përfundim Papa u uroi edhe një herë të gjithëve Krishtlindjen,
në atmosferën e Festës që, me dritat e saj, vijon të shkëlqejë e të përhapë gëzim
në të katër anët, në pritje të Solemnitetit tjetër, atij të Dëftimit të Zotit e, më
pas, edhe të Pagëzimit të Tij: “Edhe një herë, urime për një kohë Krishtlindjeje
të bekuar nga prania e Zotit”. Në përshëndetjet përfundimtare, Papa kujtoi
posaçërisht ministrantët e dioqezës së Astit, të cilët i porositi ta kryejnë me dashuri
shërbimin tejet të rëndësishëm në elter, gjë që u krijon kushtet të ndjehen më afër
Zotit. Më pas, përshëndeti edhe Bijat e Mëshirës së Kryqit, që kremtojnë këto ditë
Kapitullin e tyre të përgjithshëm, duke i siguruar se lutet që një ngjarje e tillë
e rëndësishme të ngjallë në të gjithë Institutin një zell të ri apostolik. E akoma,
përshëndeti edhe grupet e Veprimit Katolik të Pompeit e të San Marcanos mbi Sarno,
si dhe të rinjtë e Oratorit ndërfamullitar të Mortarës. I pranishëm në takimin
e së mërkurës, një grup besimtarësh, ardhur nga Gjermania, me famfarën e vet, që e
gjallëroi sallën e audiencës, duke interpretuar Këngë Kërshndellash të traditës gjermane.
E jo vetëm Sallën e Palit VI, por edhe Sheshin e Shën Pjetrit, duke mbledhur kështu
rreth vetes, në përfundim të audiencës, një turmë të madhe shtegtarësh, besimtarësh
e turistësh, që këto ditë nuk mungojnë në të gjitha orët e ditës. Janë aty, për të
kundruar Krishtin në grazhd, në Shpellën madhështore të Betlehemit, e jo më pak, edhe
Bredhin e ardhur nga Ukraina e largët, që, me vezullimet e tij ngjyra-ngjyra, vijon
të përhapë gëzimin e madh të festave të fundvitit.