Patriku Jerusalemit Tual mbi Mesazhin e Papës për paqen: të edukohen të rinjtë e Lindjes
së Mesme për të shkuar kundër rrymës.
Mesazhi i Papës për Ditën e Paqes u ndoq me vëmendje të madhe në Lindjen e Mesme që,
për fat të keq, nuk gjen paqe prej 60 vjetësh. I titulluar “Të edukohen të rinjtë
me frymën e drejtësisë e të paqes”, ishte në qendër të vëmendjes në homelinë, mbajtur
ditën e parë të Vitit të Ri 2012, nga Fortlumturia e Tij, imzot Fuad Tval.
Në një intervistë, dhënë Radios sonë, Patriku latin i Jeruzalemit nënvizon rëndësinë
e të rinjve dhe shpreh besimin se bisedimet izraelito-palestineze për procesin e paqes,
që nisën sot, do të jenë një hap i rëndësishëm përpara, në përpjekjen për t’i dhënë
fund një herë e mirë konflikteve të të gjitha natyrave. Përgjigje: -
Besoj se ky mesazh është, si të ishte bërë për ne, për ne këtu, në Tokën Shenjte,
për zonën e Lindjes së Mesme. T’i edukosh të rinjtë me frymën e drejtësisë e të paqes,
është si t’u thuash të shkojnë kundër rrymës. Nuk është aspak e lehtë, sepse kemi
një kulturë dhune, një kulturë që nuk të lë kurrë në paqe; e kemi edhe një situatë,
e cila ndikon për keq mbi njerëzit, i bën ta humbasin fare besimin në fjalimet politike,
që dëgjojnë gjatë vizitave të shumta. Fjalë! Vetëm fjalë! Por gjithsesi, e pavarësisht
nga të gjitha vështirësitë, duhet shkuar kundër rrymës, e sidomos, duhet shpresuar.
Ati i Shenjtë na kërkon t’i edukojmë të rinjtë me frymën e drejtësisë e të paqes.
E ne duhet ta bëjmë këtë. Kemi një brezni të tërë të rinjsh, si izraelitë, ashtu edhe
palestinezë, që kanë lindur e janë rritur në një mjedis, ku nuk pushon kurrë dhuna,
ku njeriu merr frymë, i rrethuar me mure, ku s’ka rrugë tjetër, veçse t’i biesh murit
me kokë. Kemi një brezni të tërë, që nuk e njeh akoma Varrin e Shenjtë të Krishtit,
për shkak të kësaj situate politike, për shkaqe sigurie e kështu me radhë, për gjithfarë
pretekstesh. E pra, të gjithë jemi të thirrur të edukojmë me frymën e paqes. Nuk është
e lehtë, e dimë. Të gjitha lëvizjet e botës arabe të këtyre të rinjve, synojnë të
sigurojnë më shumë paqe, më shumë drejtësi, më shumë dinjitet, më shumë punë.
Pyetje:
- Lidhur me këtë, Fortlumturia Juaj, Papa është krejt i qartë, kërkon që breznitë
e reja të dëgjohen e të vlerësohet ndihmesa e tyre për të mirën e përbashkët…
Përgjigje:
- Po, kjo është detyrë. Lëvizjet e para, ndryshimet e para, që nisën në
Veri të Afrikës, nuk patën ngjyrime politike, as ngjyrime fanatike, e as revolucionare,
në kuptimin e keq të kësaj fjale; donin vetëm më shumë drejtësi, më shumë dinjitet,
më shumë punë, më shumë liri ndërgjegjeje e më shumë të drejtë për të marrë frymë
më lirisht, në të gjitha drejtimet.
Pyetje: - Papa flet për të drejtat
e liritë themelore të njeriut, që duhen respektuar, e më pas flet edhe për të mirën
e përbashkët. Ç’ shpresohet për Lindjen e Mesme?
Përgjigje: -
T’i kthehemi edukimit e jemi qind për qind me Papën, sepse është i vetmi zë, si zëri
i Shën Gjon Pagëzuesit, që bërtet në shkretëtirë. Jemi në shkretëtirë, ndonëse në
zemër të qyteteve të mëdha, me shumë britma politikanësh e premtimesh të zbrazta politike.
Prej këndej, ne vijojmë të ngrejmë zërin, së bashku me Atin e Shenjtë, ashtu si Shën
Gjon Pagëzuesi, duke e ditur se nuk jemi vetëm në këto troje e se Zoti është me ne.
Të ecim, pra, përpara, duke shpresuar se ky vit i ri do të jetë me të vërtetë i ri,
në të në të gjitha kuptimet, edhe në kuptimin demokratik, në kuptimin e lirisë e të
drejtësisë.
Pyetje: - Konkretisht, në se shikojmë konfliktin izraelito-palestinez,
nuk mund të mos kujtojmë se sot dy delegacionet u takuan në Jordani. A mund ta shikojmë
këtë takim si rifillimin e bisedimeve, pas amullisë, që vijon qysh nga viti 2010?
Përgjigje:
- E di se sot është ky takim e ne i shoqërojmë të dy delegacionet, atë
izraelit e atë palestinez, me lutjet tona e duke uruar të gjindet rrugëdalja, për
të mirën e të gjithëve, për paqen e të gjithëve, për qetësinë e të gjithëve. Urojmë
paqe e të mira e shpresojmë paqe e të mira! Nuk e humbasim shpresën dhe i shoqërojmë
të dy delegacionet me lutjen tonë. Sot unë jam në Jordani, për t’u bërë urimet e Krishtlindjes
famullive të shumta, që ndodhen në këtë vend.
Pyetje: - Prej këndej,
jeni edhe fizikisht pranë këtij takimi, që mund të shënojë rifillimin, aq të dëshiruar… Përgjigje:
- Në të gjitha kuptimet jemi pranë: jemi në zemrën e situatës.