OKB-ja e shpall 2012-ën, vit ndërkombëtar të energjisë së pastër për të gjithë
Rëndësia e energjisë dhe e burimeve të saj për vendet në zhvillim do të jetë tema
kryesore e veprimtarisë së OKB-së gjatë vitit 2012. Vërtet, Kombet e Bashkuara kanë
shpallur “Vitin ndërkombëtar të energjisë së pastër për të gjithë”, me qëllim që vëmendja
e bashkësisë ndërkombëtare të përqendrohet në atë popullsi prej një miliard e gjysëm
personash, që jetojnë pa elektricitet në botë. Kujtojmë se ndër ta, bëjnë pjesë shpesh
edhe shqiptarët, sidomos gjatë dimrit. Është një kufizim jo i paktë për zhvillimin
njerëzor, siç thekson në mikrofonin tonë, klimatologu italian, Vinçenco Ferrara: Me
energji të pastër kuptojmë atë energji, përdorimi i së cilës nuk i konsumon burimet
natyrore. Ajo përdoret pa e harxhuar kot, me maksimumin e efikasitetit e në mënyrë
që ta kenë të gjithë, sidomos popujt më të varfër. Pse i kushtohet kësaj energjie,
viti 2012? Duhet të kemi parasysh se pavarësisht se Prodhimi Botëror Brut është
rritur, gjatë viteve të fundit janë shtuar edhe ndryshimet ndërmjet të pasurve e të
varfërve, është shtuar varfëria e sëmundjet si SIDA, sidomos në vendet në zhvillim,
është rritur vdekshmëria foshnjore… Prandaj, për këto vende është themelore të kenë
energji, e cila ndihmon si zhvillimin, ashtu edhe mirëqënien fizike të shoqërive e
të personave. E të gjitha vendet duhet ta përdorin si duhet energjinë, sepse nëse
ndonjëri konsumon pa respektuar ambientin, ndot planetin e nuk u lejon të tjerëve
të zhvillohen. Ç’mund të bëjmë në fushën e energjive, që respektojnë ambientin? Energjia,
që respekton ambientin, duhet të përdorë sidomos teknologjitë e reja, që, përmes materialeve
si nanomaterialet, mundësojnë harxhime të pakta energjitike dhe rendiment të lartë.
Duhet të mos varemi më nga lëndët djegëse fosile, duke shkuar drejt përdorimit të
energjive të rinovueshme, që nuk konsumojnë pasuritë e planetit. Siç është treguar
nga studimet, këto energji mund ta zëvendësojnë me 90% naftën.