Papa i lutet Zotit t’i japë bekimin mbarë njerëzimit. Detyrë e ngutshme, edukimi i
të rinjve me frymën e drejtësisë e të paqes.
Papa i lutet Zotit ta bekojë mbarë botën. Në Meshën e fillimit të vitit, kryesuar
në Bazilikën e Shën Pjetrit për Solemnitetin e Nënës së Shenjtnueshme të Zotit dhe
Ditën e 45-të Botërore të Paqes, uron që mbarë njerëzimi ta pranojë Krishtin, sepse
Ai është paqja e vërtetë.
Njerëzimi
kërkon paqen, dëshiron drejtësinë, ëndërron dashurinë. Papa tregon rrugën: t’i kthejmë
sytë kah Maria, Nëna e Zotit, është ajo, që na sjell bekimin. Është ajo, gruaja,
që e pranoi Jezusin në korpin e vet dhe e nxori në dritë, duke ia dhuruar të gjithë
familjes njerëzore, si bekim i vërtetë për mbarë botën: “Ashtu si
Maria, Kisha është ndërmjetëse e bekimit të Zotit për botën: e merr këtë bekim, duke
e pranuar Jezusin dhe e përcjell, duke e mbajtur Jezusin. Është Ai mëshira e paqja,
që bota nuk mund të na i japë, e për të cilat ka nevojë, më shumë se për bukën e përditshme”. “Të
edukohen të rinjtë me frymën e drejtësisë e të paqes”, është tema e mesazhit të Papës
për Ditën e 45-të Botërore të Paqes. Bëhet fjalë për një detyrë, që u përket të gjithëve,
pohonBenedikti XVI, e familja njerëzore, pas dy luftërave botërore, tregon
se po bëhet gjithnjë më e vetëdijshme. Por të edukosh sot, është sfidë me rëndësi
vendimtare: “Në radhë të parë, sepse në epokën aktuale, të ndikuar fuqimisht
nga mendësia teknologjike, të edukosh, e jo vetëm të arsesh, nuk është diçka që dihet
e duhet, por që zgjidhet; së dyti, sepse kultura relativiste na vë përpara një problemi
të vështirë: ka kuptim akoma të edukosh? e pastaj, të edukosh me se?”. Prej
këndej, Papa shton: “Përballë hijeve, që errësojnë sot horizontin e botës,
të marrësh mbi vete përgjegjësinë për t’i edukuar të rinjtë me vetëdijen e së vërtertës,
me vlerat themelore të jetës, me virtytet intelektuale, teologale, morale, do të thotë
ta shikosh ardhmërinë plot shpresë”. Të rinjtë sot, më shumë se kurrë,
nënvizon Papa, duhet të mësojnë vlerën e metodës së bashkëjetesës paqësore, të respektit
reciprok, të dialogut e të mirëkuptimit: “Të rinjtë, për vetë natyrën
e tyre, janë të prirur për sjellje të tilla, por pikërisht realiteti shoqëror, në
të cilin rriten, mund t’i shtyjë të mendojnë e të veprojnë në mënyrë krejt të kundërt,
intolerante e të dhunshme. Vetëm një edukim i shëndoshë i ndërgjegjes së tyre, mund
t’i shpëtojë nga këto rreziqe e t’i bëjë të aftë për të luftuar gjithnjë, e vetëm,
duke u mbështetur në forcën e vërtetësisë e të mirësisë”. Papa kujtoi edhe
përgjegjësinë që kanë për edukimin e të rinjve, familja, shkolla e edhe fetë, të cilat
e kanë për detyrë t’u mësojnë vazhdimisht fëmijëve se “Zoti është dashuri, është i
drejtë e paqësor”: “Duhen ndihmuar fëmijët, adoleshentët e të rinjtë
të krijojnë një personalitet të pasur me ndjenjën e thellë të drejtësisë e të respektit
për tjetrin, me aftësinë për t’i përballuar konfliktet pa prepotencë, me forcën shpirtërore
për të dëshmuar të mirën, edhe kur kushton shtrenjt, me faljen e pajtimin. Kështu
mund të bëhen burra e gra vërtetë paqësorë e të sigurojnë paqen”. Në Jezusin,
“dashuri e vërtetësi”, përfundoi Papa, “drejtësia e paqja” takohen e merren ngrykë:“Jezusi
është rruga, në të cilën mund të ecet. Rrugë e hapur për të gjithë, rruga e paqes.
Sot Virgjëra Nënë na e dëfton. Zoja na tregon rrugën: ta ndjekim! E Ti, Nëna Shenjte
e Zotit, na shoqëro me mbrotjen tënde. Amen”.