E bashkë me Papën Benediktin e XVI, të nderuar dëgjues, sot edhe ne ta falënderojmë
Zotin nga thellësia e zemrës për të gjitha të mirat që na ka dhuruar gjatë 12 muajve
që kaluam, që shtuan radhët e të rinjve të krishterë, rritën vëmendjen për vlerën
e paqes, të jetës e të mbrojtjes së familjes e të ambientit, nxitën hapa domethënëse
përpara në rrugën jo të lehtë të pajtimit e afrimit vëllazëror mes njerëzve, familjeve
e bashkësive fetare e shoqërore. Në këtë ditë e natë të fundvitit, lavdërimi e
falënderimi drejtuar Zotit, shoqërohet edhe me një shqyrtim të sinqertë të ndërgjegjes
sonë personale e asaj komunitare. Të gjithë t’i kërkojmë falje Zotit për mungesat
e për fajet tona, të sigurt se Hyji, është Hyji i përdëllimit, se dashuria e Tij Hyjnore
është më e madhe se fajet e mëkatet tona. Të pendohemi e të pajtohemi me Zotin e të
afërmin tonë. Në Ty shpresuam; në Ty, o Zot, do ta mbështesim rishtas shpresën
tonë - ripohojmë në këtë natë feste. Ti, o Zot, në Krishtlindje i solle gëzimin botës,
duke rrezatuar mbi rrugën e njerëzve e të popujve dritën tënde, të cilën s'ka forcë
që mund ta shuajë. Bëj që çdo njeri vullnetmirë të provojë dashurinë e paqen tënde
Hyjnore në Vitin e Ri që po fillojmë. E siç pohon edhe kalendari, Koha kalon dhe
rrjedhja e saj e pandalur na nxit t’i sjellim sytë me mirënjohje të thellë nga Hyji,
që është i Amshuar, që është Zoti i kohës e i jetës. Fjala e Mishëruar e shndërron
nga brenda jetën njerëzore. Zoti u bë si ne, për të na bërë si Veten, bij në të Birin,
njerëz të lirë e të liruar nga ligji i mëkatit. A nuk është kjo një arsye e fortë
që na shtyn t’i lartojmë Hyjit falënderimin tonë e të kërkojmë ndihmën e Tij Hyjnore?
Një falënderim që fiton vlerë të veçantë në mbarim të një viti, derisa kujtojmë ndihmën
e Zotit që s’na mungoi kurrë gjatë 12 muajve të kaluar. Ja sepse çdo bashkësi
e krishterë sonte mblidhet për t’i kënduar Zotit himnin ‘Te Deum’, këngën e lavdërimit
e të veprimit të hirit të të Shentjnueshmes Trini në jetën tonë njerëzore. E duke
e kënduar të lutemi: Ndihmoi bijtë e tu, o Zot, që i shpërbleve me gjakun tënd
të çmuar. Mbroji, me mëshirën tënde, banorët e qytetit tonë, në të cilin, ashtu si
gjetiu, mbi jetën e njerëzve e të familjeve peshojnë rëndë mungesat e varfëria, ta
shikojnë me besim ardhmërinë. “Ti je shpresa jonë! S’ do të jemi të pështjelluar
në amshim!”. Himni madhështor ‘Te Deum’ mbyllet me këtë brohori feje e besimi të
plotë në Hyjin e me këtë shpallje solemne të shpresës sonë, përmes së cilës na bën
thirrje ta shikojmë shpresën tonë kryesisht si shpresë për të tjerë, për të gjithë
njerëzit. T’i lutemi pra Zotit ta bëjë secilin nga ne, tharm të vërtetë shprese në
mjediset e ndryshme, që të mund të ndërtohet për të gjithë një ardhmëri më e mirë.
E ky është urimi ynë, për të gjithë ju dëgjues të nderuar, Natën e Vitit të Ri, urim
që ia besojmë ndërmjetësisë amtare të Marisë, Nënës së Hyjit e Yllit të shpresës!. Zotit
t’ia besojmë kohën e jetën në Vitin e Ri që fillojmë Zoti që kurorëzon këtë vit
me mirësinë e Tij Hyjnore, ju pasuroftë me dhanti e të mira qiellore gjatë tërë Vitit
të Ri. Urimi jonë për këtë Vit të Ri shndërrohet në lutje drejtuar Zotit që t’i bëjë
të frytshme përpjekjet e mirat të të gjithëve. T’ia besojmë, pra, Atij dëshirat e
planet tona dhe tërë jetën tonë. Atij t’ia lartojmë lavdet e lutjen plot besim: Ty,
o Atë i jetës, zanafillë pa fillesë, e mira e pambaruar e drita e amshuar, me Birin
e me Shpirtin Shenjt nderim e lumturi, lavdi e mirënjohje në shekuj pa mbarim. Amen! Në
Ty, o Atë i jetës shpresuam dhe në Ty do ta mbështesim prapë shpresën tonë. Ti, në
Krishtlindje i solle gëzimin botës, duke rrezatuar mbi rrugën e njerëzve e të popujve
dritën tënde Hyjnore, të cilën s’ka forcë që mund ta shuajë. Uroj që çdo njeri
vullnetmirë ta provojë e shijojë dashurinë e paqen tënde Hyjnore, o Atë i ynë Qiellor.
Amen!