Քրիստոնեաներուն Տեղափոխումները Վերջին Հարիւրամեակին
«Փիու» հիմնարկին կատարած մէկ ուսումնասիրութեան համաձայն, ներկայիս աշխարհի տարածքին
կ՛ապրին 2.18 միլիառ քրիստոնեաներ, ինչ որ մոլորակի բնակչութեան գրեթէ մէկ երրորդն է:
Այդ համեմատութիւնը գրեթէ անփոփոխ մնացած է վերջին հարիւրամեակին, սակայն Եւրոպայի տարածքին
քրիստոնեաներու համեմատութիւնը նուազած է: Արդարեւ, մինչ 1910ին եւրոպացիներուն 94 տոկոսը
քրիստոնեայ էր, ներկայիս այդ համեմատութիւնը 76 տոկոսի իջած է: Նաեւ, հարիւրամեակ մը
առաջ աշխարհի քրիստոնեաներուն 66 տոկոսը Եւրոպա կ՛ապրէր, մինչ ներկայիս այդ համեմատութիւնը
25 տոկոսի իջած է: Ներկայիս Ամերիկաներուն մէջ կ՛ապրի քրիստոնեաներուն 37 տոկոսը: Միաժամանակ,
քրիստոնեաներու թիւի եւ համեմատութեան կտրուկ աճ արձանագրուած է Ափրիկէի մէջ, Սահարայէն
հարաւ գտնուող երկիրներու տարածքին: Վերջին հարիւրամեակին, այդ համեմատութիւնը 9 տոկոսէն
63 տոկոսի բարձրացած է: Միայն Նիճերիան ունի 80 միլիոն քրիստոնեայ: Քրիստոնեաներուն
համեմատութիւնը ամենափոքրն է Միջին Արեւելքի ու Հիւսիսային Ափրիկէի մէջ, ուր քրիստոնեաները
այժմ կը կազմեն բնակչութեան միայն 4 տոկոսը: Հետազօտութեան տուեալներուն համաձայն,
քրիստոնեաներուն մօտաւորապէս կէսը կաթոլիկ է: Բողոքականութեան կը դաւանի մնացեալ 37 տոկոսը,
իսկ ուղղափառութեան՝ 12 տոկոսը: Քրիստոնէութիւնը կը մնայ մոլորակի ամենատարածուած կրօնը,
իսկ երկրորդ դիրքը կը գրաւէ իսլամութիւնը, որ ունի 1.5 միլիառ հետեւորդ: