Սարկաւագներու Ձեռնադրութիւն Մայր Աթոռ Սբ. Էջմիածինի Մէջ։
Մայր Աթոռ Սբ. Էջմիածինի մէջ Դեկտեմբեր 26ին նշուեցաւ Սբ. Ստեփանոս Նախավկայի եւ առաջին
մարտիրոսի տօնը: Տօնին առիթով Մայր Տաճարին մէջ մատուցուեցաւ Ս. Պատարագ, որուն ընթացքին,
ձեւաւորուած աւանդոյթին համաձայն, տեղի ունեցաւ սարկաւագական ձեռնադրութիւն:
Ն.Ս.Օ.Տ.Տ.
Գարեգին Բ. Ամենայն Հայոց Կաթողիկոսի օրհնութեամբ՝ Տ. Մուշեղ եպիսկոպոս Պապայեան կատարեց
Գէւորգեան հոգեւոր ճեմարանի 29 սաներու, ինչպէս նաեւ Արարատեան Հայրապետական թեմի եւ
Արագածոտնի թեմի երկու սպասաւորներու սարկաւագական ձեռնադրութիւնը: Ձեռնադրութենէն
ետք խօսած իր քարոզին մէջ՝ ձեռնադրող Սրբազան Հայրը՝ տօնին առիթով շնորհաւորեց նորընծաները
եւ Մայր Աթոռի սարկաւագաց ողջ դասը: Սրբազան հայրը յորդորեց նորընծայ սարկաւագներուն,
հոգեւոր կեանքի մէջ Ս. Ստեփանոսի օրինակը ունենալով՝ ամբողջովին նուիրուիլ Առաքելական
Եկեղեցւոյ ու անոր հաւատաւոր ժողովուրդի սպասաւորութեան: Տօնին առիթով Մայր Աթոռի
բոլոր սարկաւագներուն Հայրապետական իր օրհնութիւնն ու հայրական պատգամը բաշխեց Գարեգին
Բ. Հայրապետը: Շնորհաւորելով սարկաւագները Ս. Ստեփանոսի տօնին առիթով` Ամենայն Հայոց
Կաթողիկոսը անդրադարձաւ Ս. Ստեփանոսի օրինակին ` նշելով, որ անմնացորդ ծառայանուիրումի
լաւագոյն օրինակը այսօր կը ներկայանայ հոգեւոր սպասաւորներուն` յանձին Ստեփանոս Նախավկայի,
որ իր կեանքը ընծայաբերեց եւ արիաբար հանդէս եկաւ Քրիստոսի Աւետարանի, վարդապետութեան
պաշտպանութեամբ, իր խօսքով վկայեց Քրիստոսի կեանքի ճշմարտութիւնը եւ չտարակուսեցաւ զոհաբերել
իր կեանքը: «Այդպիսի անձերն են, որ կերտում են փառքը Քրիստոսի Եկեղեցու` նաեւ արժանանալով
Տիրոջ ողորմութեանը... Մենք կարող ենք մարտիրոսութեան պսակը կրել մեր աշխատանքով ու նուիրումով,
մեր ջանասէր եւ նախանձախնդիր գործունէութեամբ, մեր վարքով ու բարքով. Եկեղեցին այդպիսի
նուիրեալների պէտք ունի»,- ըսաւ Նորին Սրբութիւնը` մաղթելով երիտասարդներուն, որ Նախասարկաւագի
օրինակը ներշնչող ըլլայ անոր հոգեւոր առաքելութեան ճանապարհին, եւ մշտապէս արժանաւոր
անձեր ըլլան Եկեղեցւոյ անդաստանին մէջ` գնահատուած, սիրուած ու մեծարուած ժողովուրդի
կողմէ: Նշենք որ Մայր Աթոռ Սուրբ Էջմիածինը ունի 136 սարկաւագներ , որոնց 86ը` Միաբանութեան
շարքերուն, իսկ 50ը` Գէորգեան Հոգեւոր Ճեմարանին մէջ: