Nga Bredhi i Krishtlindjes e nga Shpella e Betlehemit buron mesazhi i vëllazërisë,
që e davarit trishtimin.
Një simbol, që e pasuron vlerën simbolike të Shpellës e që, së bashku me ikonën e
Betlehemit, i flet botës për shpresë e paqe që buron nga Foshnja Hyjnore. Ky është
mesazhi që na vjen nga dritat e Bredhit të Krishtlindjes. Simboli tradicional i
Krishtlindjes, për këtë kohë e këtë Festë në Vatikan, por për shumkënd, edhe rikthim
në kohë të kaluara, që ringjall në kujtesë vende, kohë e fytyra të dashura e, në shoqëri
të njerëzve sjell atmosferën familjare të Krishtilindjes, e edhe kujtimin e traditave
të festës që na përsjell tradita. Bredhi i Krishtlindjes është shenjë që na nxit për
të festuar e për të shprehur mirënjohjen, por edhe për të reflektuar mbi kuptimin
që kanë, pranë Shpellës ku lindi Krishti, dritat dhe stolitë, të cilat vezullojnë
çdo vit mbi Shpellën e Betelehemit në zemër të Sheshit të Shën Pjetrit në Vatikan
e në miliona familje e shtëpi, përhapur nëpër botë, në male e fusha, qytete e fshatra
e deri në skajet më të largëta, ku ndërrohen stinët e bredhi vezullon herë nën dëborë
e herë nën rreze tropikale diellore. “Bredhi i Krishtlindjes pasuron vlerën
simbolike të Shpellës së Betlehemit, që është mesazh i vëllazërimit e i miqësisë;
grishje për bashkim e paqe, ftesë për t’i bërë vend, në jetën tonë e në shoqëri, Hyjit,
i cili na dhuron dashurinë e tij të gjithëpushtetshme përmes figurës së brishtë të
një Ferishteje, sepse dëshiron që dashurisë së tij t’i përgjigjemi lirisht me dashurinë
tonë”. Bredhi, i prerë pa dëmtuar jetën e pyllit e i zbukuruar këndshëm, që
do të rrijë pranë Shpellës së Betlehemit deri në përfundim të festimeve të Krishtlindjes,
për t’u admiruar nga shtegtarët e shumtë, që kanë ardhur e do të vijnë këto ditë në
Vatikan nga të katër anët e botës, vazhdon të transmeton mesazhin jetëdhënës që vjen
nga Emanueli – Zoti me ne. Dritat, e ndizura, janë simbol i dritës që Krishti, me
lindjen e Tij, i solli njerëzimit për të davaritur errësirën e gabimit, të trishtimit,
të mëkatit e për të pranuar e përqafuar Dritën e Dashurisë së Zotit. “Shpella
e Betlehemit e Bredhi sjellin një mesazh shprese e dashurie e ndihmojnë në krijimin
e klimës të përshtashme për ta jetuar në përmasën e duhur shpirtërore e fetare, misterin
e Lindjes së Shëlbuesit”.