Ֆրանսայի Խորհրդարանը Վաւերացուց Հայոց Ցեղասպանութեան Ժխտումը Քրէականացնող Օրինագիծը։
Ֆրանսայի Խորհրդարանը երէկ( 22/12/2011) աւելի քան երեքուկէս ժամ տեւած քննարկումներէ
ետք որդեգրեց Հայոց Ցեղասպանութեան ժխտումը քրէականացնող օրինագիծը, որ խորհրդարանին
ներկայացուած էր երեսփոխան տիկին Վալերի Պուայէի առաջարկով: Միութիւն Յանուն Ժողովրդային
Շարժումի կուսակցութենէն(UMP) հայազգի երեսփոխան Փաթրիք Տեւեճեան խորհրդարանին առջեւ
իր արտասանած խօսքին ընթացքին յայտնեց, որ կարծիքի ազատութիւնը եւ քարոզչութիւնը պէտք
չէ իրարու հետ շփոթել: Ան ընդգծեց, որ քննարկուող օրինագիծը ուղղուած է Հայոց ցեղասպանութիւնը
ժխտող Թուրքիոյ պետական քարոզչութեան դէմ: Նոր օրինագիծի համաձայն` Ֆրանսայի մէջ Հայոց
Ցեղասպանութիւնը ժխտողներուն մինչեւ մէկ տարուան բանտարկութիւն կը նախատեսուի եւ 45.000
Էուրօ տուգանք: Այժմ օրէնքը պէտք է հաստատուի Ծերակոյտի կողմէ։