Papa në takim me kardinajtë e Kurien Romake: përgjigjja për krizën e fesë vjen nga
gëzimi i DBR-së
“Thelbi i krizës së Kishës në Evropë është kriza e fesë”. Ilaçi kundër kësaj krize
gëzimi, që rrjedh nga Ditët Botërore të Rinisë, të cilat i japin kuptim të ri të qenit
të krishterë. Ky ishte thelbi i reflektimit të gjatë të Benediktit XVI me Kurien Romake,
sot paradite, në takimin tradicional për shkëmbimin e urimeve të Krishtlindjes. Papa
përmendi etapat më të rëndësishme të veprimtarisë vjetore, duke u përqendruar në veçanti,
mbi temën e ringjillëzimit të kontinentit të vjetër e duke marrë si shembull Ditët
Botërore të Rinisë, nga ku nxorri pesë pika, që mund t’i ndihmojnë të krishterët ta
përtërijnë jetën e besimin e tyre në Zotin. Benedikti XVI bëri një fotografi të
Evropës bashkohore, e cila duket sikur e vuan të qenit të krishterë, duke ia kundërvënë
Afrikës – të cilën e pa kohët e fundit, përmes vizitës në Benin – ku preket me dorë
“gëzimi i të qenit të krishterë”: “Nga ky gëzim lindin edhe energjitë për t’i
shërbyer Krishtit në situatat shtypëse të vuajtjes njerëzore, për t’u vënë në dispozicion
të Tij, pa menduar vetëm për mirëqënien personale. Takimi me këtë fe, të gatshme për
çdo flijim - e pikërisht për këtë, plot gëzim - është një ilaç i fuqishëm kundër lodhjes
së të qenit të krishterë, që ndjejmë në Evropë”. Pra Veriu i pasur, për mënyrën
si e koncepton Kisha botën, është sot pjesa më e varfër dhe më e varfëruar e globit,
në krahasim me Jugun e tij. Deri në atë pikë, sa Papa ka krijuar struktura, si dikasteri
për Ungjillëzimin e Ri e, ka shpallur periudha të veçanta, si “Viti i fesë”, në përpjekjen
për ta ndryshuar këtë gjendje: “Thelbi i krizës së Kishës në Evropë… është kriza
e fesë. Nëse nuk gjejmë përgjigje për të, nëse feja nuk gjallërohet, duke u bërë bindje
e thellë dhe forcë e vërtetë, falë takimit me Jezu Krishtin, të gjitha reformat e
tjera nuk do të kenë rezultat”. “Si ta shpallim Ungjillin sot?”. Kësaj, që
është më e madhja e pyetjeve për Kishën e sotme e të nesërme, Benedikti XVI iu përgjigj
me origjinalitet, duke përshkruar pesë pika të trashëgimisë, që kanë sjellë Ditët
Botërore të Rinisë gjatë këtyre dhjetëvjeçarëve. Pikësëpari, në këto Ditë përjetohet
“një përvojë e re e katolicitetit dhe e universalitetit të Kishës”, gjatë së cilës
njerëz me preardhje e kultura të ndryshme takohen me Krishtin dhe e kremtojnë me mënyrën
e tyre: “Liturgjia e përbashkët përbën një lloj atdheu të zemrës e na bashkon
në një familje të madhe. Fakti që të gjithë njerëzit janë vëllezër e motra është këtu
jo vetëm një ide, por bëhet një përvojë e vërtetë e përbashkët, që krijon gëzim”. Pikërisht
prej këndej, prej këtij uniteti, lind mënyra e re e të qenit njerëz, e të qenit të
krishterë, theksoi Papa. Më pas, Benedikti XVI mori si shembull ata 20 mijë vullnetarët,
që për javë e muaj, iu përkushtuan me korp e me shpirt organizimit të Ditës Botërore
të Rinisë në Madrid: “Këta të rinj, ofruan plot fe një pjesë të jetës, jo sepse
ua kishte urdhëruar ndokush e jo sepse kështu do të fitonin qiellin; as sepse kështu
largoheshin nga rreziku i ferrit. Nuk e bënë, sepse donin të ishin të përsosur… Këta
të rinj bënë të mira – megjithëse me punë të rëndë e me sakrifica – thjesht sepse
të bësh mirë është bukur, të jesh për të tjerët është bukur. Duhet vetëm të kesh guxim
për ta bërë këtë hap”. Të rinj që, me një fjalë, “nuk shihnin pas, nuk shihnin
vetveten”. Në të kundërt, të krishterët e sotëm të botës perëndimore sillen si gruaja
e Lotit në Bibël, e cila duke parë mbrapa u kthye në një shtatore kripe: “Sa
herë, jeta e të krishterëve karakterizohet nga fakti se shohin sidomos vetveten, bëjnë
të mira, si të thuash, për vetveten! E sa i madh është tundimi për të gjithë njerëzit
të shqetësohen para së gjithash për vetveten, të shohin pas vetes, duke u zbrazur
nga brenda, duke u bërë “shtatore kripe”!” Në pikën e tretë, Ati i Shenjtë
vuri në dukje “adhurimin e Zotit”, si element shpirtëror të rëndësishëm të Ditëve
Botërore të Rinisë, gjithnjë protagonist i një “heshtjeje të brendshme” impresionuese
para Hostes së Shenjtë, pavarësisht nga turmat pa fund e anë dhe nga koha e keqe,
siç ndodhi këtë vit në Madrid. E së bashku me Eukaristinë, edhe pika e katërt, që
del nga këto takime oqeanike të rinjsh: prania e “Sakramentit të Pendimit”, përjetuar
me natyrshmërinë, që mungon shpesh gjetiu. Ndërsa pika e pestë lidhet me faktin, e
denoncuar nga Papa në fillim të reflektimit me Kurien Romake, se kriza ekonomiko-financiare,
që kërcënon sot Evropën, është sidomos “krizë etike”. Është pikërisht mungesa e etikës,
që bën të mos kenë më rëndësi arsyet, që çojnë drejt sakrificave, për hir të të varfërve.
Dyshimi për praninë e Zotit në histori, shpjegoi Papa, kthehet në mënyrë të pashmangshme
në dyshim mbi njeriun e mbi nevojën për ta konsideruar vëlla, që bashkëndan me të
tjerët të njëjtin fat. Këtij dyshimi, të rinjtë e Ditëve Botërore të Rinisë i përgjigjen
me gëzim: “Shohim sot si përhapet ky dyshim. E shohim në mungesën e gëzimit,
në trishtimin e brendshëm, që mund të lexohet në fytyrat e njerëzve. Vetëm feja na
jep sigurinë: është mirë që unë të jem. Është mirë, që unë të ekzistoj si njeri, edhe
në kohë të vështira. Feja na bën të gëzuar, duke nisur nga brenda vetvetes. Kjo është
një nga përvojat e mrekullueshme të Ditëve Botërore të Rinisë”. Pasi përmendi
udhëtimet ndërkombëtare e italiane, që ka bërë gjatë këtij viti, Papa përfundoi duke
folur veçanërisht për takimin e fundit ndërfetar në Asizi të Italisë. “U takuam atë
ditë – tha Benedikti XVI – në një atmosferë miqësie e respekti të ndërsjelltë, me
dashurinë për të vërtetën e me përgjegjësinë e përbashkët për paqen. Mund të shpresojmë
pra, që nga ky takim, të ketë lindur një gatishmëri e re për t’i shërbyer paqes, pajtimit
e drejtësisë”.