Papa: Krishtlindja nuk e humbë domethënien e vet të thellë fetare
Të bëjmë që Krishtlindja “të mos e humbë domethënien e vet të thellë fetare e që festa
të mos përthithet nga aspekti i jashtëm. Sigurisht që shenjat e jashtme janë të rëndësishme”
atëherë kur “na ndihmojnë ta jetojmë e përjetojmë Krishtlindjen në kuptimin më të
vërtetë të saj, atë të shenjtë e të krishterë”. Ky është mesazhi që Papa u drejtoi
shtegtarëve në audiencën e përgjithshme mbajtur sot paradite në Vatikan dhe të gjithë
besimtarëve të krishterë kudo në botë. “Liturgjia e Krishtlindjes - kujtoi Benedikti
XVI – na udhëheq e çon në misterin e madh të mishërimit. Vet Zoti ka ardhur për të
banuar në mesin tonë”. “Kjo lindje e përshkon dhe njom tërë historinë e vazhdon të
qëndrojë edhenë realitetin e sotëm”, tha Ati i Shenjtë, duke nënvizuar se
“Krishtlindja përtërin bindjen që Zoti është realisht i pranishëm ndër ne, është afër
nesh. E ne mund ta takojmë sot, në të sotmen që nuk ka mbarim”. Papa Ratcinger
vërejti se “njeriu bashkëkohor përherë më tepër has në vështirësi për t’i hapur horizontet
e për të hyrë në botën e Zotit”, por “ngjarjet e shpëtimit hyjnor janë përherë aktuale,
interesojnë, u takojnë të gjithëve njerëzve, sepse Hyji çdonjërit prej nesh i ofron
mundësinë për ta njohur” nga afër. “Ju uroj ta kremtoni Krishtlindjen e vërtetë
të krishterë – tha Papa në përfundim të katekizmit të audiencës së sotme -, në mënyrë
që edhe shkëmbimi i urimeve të jetë një mënyrë për të thënë e pohuar se Zoti është
vërtetë afër nesh”.