Papa në dialog me të burgosurit: Erdha t’ju them se Zoti ju do!
Drejtësia e mëshira në logjikën e Zotit. Papa Benedikti XVI gjatë vizitës së
tij në burgun e Romës 'Rebibbia', të dielën e kaluar, kërkoi respektimin e plotë të
dinjitetit të çdo të burgosuri. Drejtësia, mëshira, dashuria: janë pikat themelore
të përmendura e të nënvizuara nga Ati i Shenjtë Jozef Ratcinger gjatë vizitës së tij,
të dielën më 18 dhjetor, në burgun romak ‘Rebibbia’. Në fjalimin e tij Papa Ratcinger
denoncoi, mes tjerash, gjendjen e vështirë dhe “ndëshkimin e dyfishtë” të të burgosurve
të cilët janë detyruar të jetojnë në kushte vërtet dramatike për shkak të numrit tejet
të madh të të burgosurve, pra të mbipopullimit të burgjeve. E Benedikti XVI iu përgjigj
edhe pyetjeve, që i bënë disa të burgosur:
Pyetje: - Dëshiroj ta pyes
Shenjtërinë Tuaj në se ky gjest do të kuptohet, në thjeshtësinë e tij, edhe nga politikanët
e qeveritarët tanë, në mënyrë që t’u rikthehet gjithë të fundmëve, përfshirë edhe
ne, të burgosurve, dinjiteti e shpresa, që duhet t’i njihet çdo njeriut të gjallë?
Përgjigje:
-Erdha sidomos për t’ju dëshmuar afërsinë personale e shpirtërore.
Drejtuesit e vendit do të bëjnë ç’është e mundur për ta përmirësuar këtë gjendje,
për t’ju ndihmuar të gjeni realisht, këtu, një drejtësi, e cila ju ndihmon të riktheheni
në shoqëri me të gjithë respektin, që i takon çdo njeriu”.
Pyetje: -
Quhem Omar. Më shumë se t’ju bëj një pyetje, dëshiroj t’ju shpreh vuajtjen tonë e
të familjeve tona. Ju dua shumë!
Përgjigje: - Edhe unë të
dua e të jam mirënjohës për fjalët, që më prekën thellë në zemër. Erdha, sepse e di
që Zoti më pret ndërmjet jush”.
Pyetje: - Quhem Albert. Shenjtëri,
a ju duket e drejtë që sot, kur jam bërë njeri tjetër, njeri i ri, e prej dy muajsh,
edhe baba i një vajze të mrekullueshme, me emrin Gëzime, nuk më lejojnë të rikthehem
në shtëpi, edhe pse e kam paguar, madje me të tepërt, borxhin, që i kisha shoqërisë?
Përgjigje:
-Para së gjithash, urime! Jam i lumtur që jeni bërë baba, që e
ndjeni veten njeri të ri. Lutem e shpresoj që ta merrni sa më shpejt në krahë bijën
tuaj, të jeni pranë gruas e fëmijës, për të ndërtuar një familje të bukur, duke bashkëpunuar,
kështu, edhe për ardhmërinë e Italisë”.
Pyetje: - Jam Federiku.
Tepër pak flitet për ne, e shpesh me një egërsi të tillë, si të donin të na shkulnin
nga radhët e shoqërisë, si të ishim bar i keq. Kjo na bën ta ndjejmë veten diçka më
pak se njerëz.
Përgjigje: -Duhet t’i durojmë edhe
ata, që flasin egërsisht; ashtu flasin edhe kundër Papës e, megjithatë, ne ecim përpara.
Më duket e arsyeshme t’i nxit të gjithë për t’i kuptuar vuajtjet tuaja. Çdo njeri
mund të rrëzohet, por Zoti dëshiron që të gjithë të arrijnë tek Ai. E ne duhet të
bashkëpunojmë për këtë me frymë të vërtetë vëllazërie. Zoti do t’ju ndihmojë, e ne
jemi gjithnjë pranë jush”.
Pyetje: - Shenjtëri, më
kanë mësuar se Zoti shikon e lexon brenda nesh. Prej këndej, nuk mund të mos e pyes
veten pse zgjidhja e mëkateve u është besuar priftërinjve. Në se unë i lutem Zotit
të më falë, i vetëm, në dhomën time, me gjithë zemër, thua nuk do të më falë?
Përgjigje:
-Do të thosha dy gjëra. E para: natyrisht, në se ju gjunjëzoheni
e, me dashuri të vërtetë për Zotin, i luteni t’ju falë, ai do t’ju falë. Por zgjidhja
e meshtarit, zgjidhja sakramentore, është e nevojshme për faljen reale, sepse zgjidhje
nga mëkati do të thotë se Zoti më fal, më pranon përsëri në bashkësinë e të tijve.
Pyetje:
- Shenjtëri, muajin e kaluar keni qenë për vizitë baritore në Afrikë, në kombin
e vogël të Beninit, një nga kombet më të varfra të botës. Ju pyes: ata vdesin nga
varfëria e nga dhuna… Thua Zoti dëgjon vetëm zërin e njerëzve të pasur e të pushtetshëm?
Përgjigje:
- Kriteret e Zotit janë të ndryshme nga tonat. Zoti u jep edhe këtyre të
varfërve gëzimin, ngushëllimin e pranisë së tij, e na bën thirrje të gjithëve të bëjmë
ç’është e mundur për të dalë nga errësira e sëmundjes dhe e varfërisë”.
Para
se të largohej nga burgu romak Rebibbia, Papa u bëri të gjithëve urimet e tij për
Krishtlindje: “Të diel të gëzuar e për shumë vjet Krishtlindjet.
Urime, faleminderit!”.