Папа да моладзі з Каталіцкай акцыі: ў сваім жыцці вучыцеся дапамагаць іншым
19 снежня Бэнэдыкт
ХVI сустрэўся ў Ватыкане з групаю італьянскай моладзі з Каталіцкай акцыі. Падчас сустрэчы
са Святым Айцом маладыя італьянцы пазнаёмілі Пантыфіка са сваёй ініцыятывай пабудаваць
у Балівіі для моладзі гэтай краіны бібліятэку і дзіцячы сад. Папа ў прамове да іх
выказаў сваю радасць з гэтага рашэння. “Заўсёды будзьце чуллівымі да тых, хто мае
патрэбу ў дапамозе. Рабіце, як Езус, Які не пакідаў нікога самотным перад праблемамі,
але заўсёды з імі сустракаўся, дзяліў цяжкасці, дапамагаў і даваў сілу і Божы супакой”,
- сказаў Папа.
Затым Папа нагадаў словы, якія Езус скіраваў да Бартымэя, сляпога
жабрака: “Уставай, Бог кліча цябе”. “ У гэтых словах мы знаходзім не толькі заклік
Езуса да нас, але гэта заклік Бога жыцця, каб мы ў сваім жыцці вучыліся дапамагаць
іншым і казаць Езусу: дзякую за ўсё, што Ты мне даў”, - сказаў Папа.
Святы
Айцец адзначыў, што заклік “Уставай, Бог кліча цябе”, мы атрымалі шмат разоў ў сваім
жыцці. “Першы раз гэта здарылася, калі атрымалі дар жыцця. Мы павінны быць заўсёды
уважнымі да гэтага вялікага дара, дзякавалі за яго і прасілі Бога, каб надзяліў гэтым
радасным дарам усіх маладых людзей свету: каб усе мелі павагу ў сваім жыцці, і каб
усе мелі ўсё неабходлнае да жыцця”, - сказаў Пантыфік.
Папа нагадаў, што заклік
“Уставай, Бог кліча цябе”, мы атрымалі таксама падчас сакрамантаў хросту і камуніі,
калі нашае сяброўства з Езусам стала вельмі сціслым. Цяпер Ён заўсёды суправаджае
нас на нашым шляху жыцця. “Дарагая моладзь! Адгукіцеся на заклік Пана, які кліча вас
да прыязні з Ім: Ён ніколі вас не расчаруе”, - сказаў Бэнэдыкт ХVI да моладзі з Каталіцкай
акцыі.