Prekëse, vizita e Benediktit XVI në burgun romak Rebibbia.
“Ku është një i burgosur, aty është edhe Krishti”. Me këto fjalë iu drejtua Benedikti
XVI të burgosurve në burgun romak Rebibbia, ku ishte dje për vizitë. Kisha, tha Papa,
e njeh misionin e saj profetik për ata, që janë të lënduar nga kriminaliteti, ashtu
si njeh edhe nevojën e tyre për pajtim me Zotin, për drejtësi, për paqe. Të burgosurit,
shtoi, meritojnë të trajtohen me respekt e dinjitet.
Fjalët e Gjyqit të Mbramë,
treguar nga Shën Mateu Ungjilltar: “Isha në burg, e erdhët të më takoni”, shprehin
plotësisht kuptimin e vizitës së Papës në burgun romak Rebibbia: “Kudo
është një i uritur, një i huaj, një i sëmurë, një i burgosur, aty është vetë Krishti,
që pret vizitën tonë, ndihmën tonë. Kjo, arsyeja kryesore, e cila më bën të ndjehem
i lumtur, që jam këtu, për t’u lutur, për të dialoguar, për të dëgjuar”. Duke
iu drejtuar të burgosurve, Ati i Shenjtë shtoi se dashuria e Zotit nuk njeh cak as
kufi: “Erdha thjesht për t’ju thënë se Zoti ju do me dashuri të pakufishme
e se jeni gjithnjë bijtë e Tij. Edhe Biri i vetëm i Hyjit, Zoti Jezus, e provoi ç’do
të thotë burg, iu nënshtrua gjykimit para një gjykate dhe pësoi dënimin më mizor,
atë me vdekje!”. Papa kujtoi se është urgjente të rivendoset drejtësia,
të riedukohen fajtorët e t’u jepet fund rasteve të gabimeve gjyqësore, si dhe atyre
të moszbatimit të ligjit: “Të burgosurit janë njerëz që, pavarësisht nga
krimi i kryer, meritojnë të trajtohen me respekt e me dinjitet”. Drejtësia
njerëzore e ajo hyjnore, tha më pas Papa, janë shumë të ndryshme: “Sigurisht
njerëzit nuk janë në gjendje ta zbatojnë drejtësinë hyjnore, por duhet, së paku, ta
kenë parasysh, ta kuptojnë shpirtin e thellë, i cili e frymëzon, që të mund ta ndriçojë,
kështu, edhe drejtësinë njerëzore, për të shmangur rrezikun që i burgosuri të bëhet
njeri i përjashtuar nga shoqëria, gjë që, për fat të keq, ndodh shpesh”. Duhet
parë gjithnjë, pohoi Ati i Shenjtë, shpirti i vërtetë i ligjit: “Zbatimi
më i përsosur i ligjit, është dashuria, shkruan Shën Pali (Rom 13.10).
Drejtësia jonë do të jetë shumë më e përkyer, në se frymëzohet nga dashuria për Zotin
e për vëllezërit”. Pasi kujtoi se grumbullimi i madh i njerëzve dhe zvetënimi
i tyre mund ta bëjnë edhe më të hidhur heqjen e lirisë, Papa uroi që Krishtlindja,
tashmë afër, të rindezë në të gjitha zemrat, shpresë e dashuri:“Foshnja e Betlehemit
do të jetë e lumtur kur të gjithë njerëzit të kthehen tek Hyji me zemër të re. T’i
lutemi në heshtje e në uratë të na çlirojë të gjithëve nga burgu i mëkatit, nga kryelartësia
e mendjemadhësia; secili ka nevojë të dalë nga ky burg shpirtëror, për të qenë vërtet
i lirë nga e keqja, nga ankthi, nga vdekja”.